ՀԱՅԿԱԿԱՆ ԺԱՄԱՆԱԿ. Աղվանն ընդդեմ Ալիկի

Մեր տեղեկություններով` մեկ շաբաթ առաջ` փետրվարի 24-ի ՀՀ կառավարության նիստից հետո, ՀՀ ոստիկանապետ Ալիկ Սարգսյանի եւ ՀՀ գլխավոր դատախազ Աղվան Հովսեփյանի միջեւ թեժ վեճ է տեղի ունեցել, որը շարունակվում է մինչ օրս:

Վեճի պատճառը եղել է դրանից մեկ օր առաջ Աղվան Հովսեփյանի կողմից Ալիկ Սարգսյանին ուղարկված գրությունը, որով նա առաջարկել է զբաղեցրած պաշտոններից ազատել ՀՀ քրեական հետախուզության գլխավոր վարչության պետ Հովհաննես Թամամյանին եւ Արաբկիրի ոստիկանապետ Վարազդատ Ադամյանին:

Ալիկ Սարգսյանը հանդիմանել է գլխավոր դատախազին, որ նա իրեն չասի ինչ անել, ում ազատել կամ չազատել:

Ավելին, չնայած ՀՀ ոստիկանապետն, ի վերջո, կատարել է Հովսեփյանի ասածը եւ փետրվարի 27-ին Թամամյանին եւ Ադամյանին ազատել է զբաղեցրած պաշտոններից, սակայն, միեւնույն է, գլխավոր դատախազը որոշել է նրան մինչեւ վերջ նվաստացնել: Աղվան Հովսեփյանի` վեճի առարկա դարձած գրությունը երկու օր առաջ ՀՀ գլխավոր դատախազության կայքում հրապարակելու նպատակը հենց դա է եղել, որ բոլորն իմանան, թե ում ցուցումով է Ալիկ Սարգսյանը գործում: