Նոր-հին վճարողներ

Սոցիալական ապահովության հիմնադրամի վճարման ծառայության նախկին աշխատակիցների խնդիրը, կարծես, լուծվում է: Հիշեցնենք` ծառայության նախկին աշխատակիցներին նման խոստում էր տվել սոցապ նախարարը` մոտ տասն օր առաջ:

Երեկ նրանք արդեն այցելում էին թոշակառուներին` իրազեկելով, որ վերջիններս կրկին կարող են թոշակներ ստանալ իրենց «հին» վայրից եւ «հին» աշխատողների միջոցով:

Ինչպես մեզ հետ զրույցում հավաստիացրեց մոտ հարյուր նախկին վճարողների հետ արդեն պայմանագիր կնքած «Մեգա Պանտերա» ՍՊԸ-ի կոմերցիոն տնօրեն Գեորգի Խուրշուդյանը, աշխատանքի ընդունվողները տեղեկացված են, որ անգամ «մեկ լումա» անհարկի բռնագանձելու դեպքում նրանք աշխատանքից կազատվեն անհապաղ` առանց նախազգուշացման: Իսկ դժգոհությունները տեղ հասցնելու համար «նոր»-նախկին վճարողները պարտավորված են յուրաքանչյուր թոշակառուի դիմումի ձեւը ներկայացնելու հետ միաժամանակ տրամադրել նաեւ վճարահաշվարկային կազմակերպության թեժ գծի հեռախոսահամարները:

Աշխատանքի եւ սոցիալական հարցերի նախարարությունից եւս հաստատեցին «Մեգա Պանտերա»-ի հետ պայմանագրի կնքման փաստը: Իսկ այն հարցին` արդյո՞ք սա նշանակում է, որ լուծվում է վճարման նախկին ծառայության աշխատողների զբաղվածության հարցը, նախարարության Կենսաթոշակային ապահովման վարչության պետ Սմբատ Սաիյանը պատասխանեցՙ «հավանաբար»: