Օմբուդսմենը պետք է պատրաստ լինի քաղաքական շանտաժի

Հայաստանը կայացած ժողովրդավարական երկիր չէ, եւ շատ դեպքերում օմբուդսմենը վերականգնում է իրավունքը հենց այն պաշտոնյայի միջոցով, որն արել է այդ խախտումները. ՄԻՊ պաշտոնում իր վերջին ասուլիսի ժամանակ ասաց Արմեն Հարությունյանը: Ըստ նրա` պաշտոնյան պետք է ընդունի, որ ինքը նման խախտումներ է արել եւ օմբուդսմենի հետ միասին նպաստի դրանց բացահայտմանը, թեեւ դա դժվար է:

Օմբուդսմենը նաեւ նշեց, որ մարդու իրավունքների պաշտպանի ինստիտուտին հաջողվել է հեռու մնալ քաղաքական տարբեր գործընթացներից: «Ե ՜վ իշխանական ուժերն են պարբերաբար դժգոհել մեզանից, ե ՜ւ ընդդիմադիր, բայց այն, որ մենք, այնուամենայնիվ, կարողացանք չձուլվել ո ՜չ մեկ, ո ՜չ էլ մյուս կողմին, կարծում եմ` մեծ արդյունք է»,- նշեց Ա. Հարությունյանը` հավելելով, սակայն, որ այդ հարցում ինքը լիարժեք բավարարված չէ, եւ դեռ անելիքներ կան:

Արմեն Հարությունյանի խոսքով` սա հաջորդ օմբուդսմենի համար ամենամեծ մարտահրավերն է: «Նա պետք է ուղղակիորեն պատրաստ լինի քաղաքական շանտաժի»,- ասաց մարդու իրավունքների պաշտպանը: