Թուրքերը դեռ պարզում են ակնհայտը

ՀՀ վաստակավոր արտիստ Թովմաս Պողոսյանը լրագրողների հետ հանդիպմանն ասաց, որ Սայաթ-Նովայի 300-ամյակին /2012թ./ պետք է նախապատրաստվել այսօրվանից: Այս առիթով, Պողոսյանն առաջարկով դիմել է արդեն Սփյուռքի եւ Մշակույթի նախարարություն` ստանալով դրական պատասխան:

Ամիսներ առաջ թուրքական TRT հեռուստեսությանը հարցազրույց է վերցրել Թ. Պողոսյանից` նշելով, որ իրենց նկարահանող խումբն արդեն եղել է Թիֆլիսում, որտեղ ասել են, թե Սայաթ-Նովան թուրք է, իսկ Բաքվում էլ հավաստիացրել, թե վրացի է:

«Ես նրանց հարցրի, թե ինչպե՞ս կարող է հայ եկեղեցու սպասավորը լինել թուրք կամ վրացի: Ինչպես նաեւ առաջարկեցի գնալ Մատենադարան եւ կարդալ աշուղի ձեռագրերը: Սայաթ-Նովան այնքան մեծ է` շատերը ցանկանում են, որ իրենցը լինի` հենվելով այն հանգամանքի վրա, որ նրանց լեզվով էլ է գրել երգեր»:

Թուրք լրագրողները գնացել են Մատենադարան, բայց թե հաղորդման մեջ ինչպես են ներկայացրել փաստերը, հայտնի չէ. պարոն Պողոսյանը չի նայել հաղորդումը:

Թովմաս Պողոսյանը հորդորում է բոլորին` ըստ արժանվույն նախապատրաստվել Սայաթ-Նովայի հոբելյանին:

«2010թ. կեսերից արդեն սկսել ենք պատրաստվել հոբելյանին. հրատարակելու ենք Սայաթ-Նովայի երգերի ձայնագրյալ ժողովածուն, որը վերջին անգամ ձայնագրվել է 1963թ.` աշուղի 250-ամյակին. այս ընթացքում «ավելացել» է նրա ստեղծագործությունների թիվը»,-ասաց Պողոսյանը:

Հոբելյանի առիթով համերգներ կլինեն Հայաստանում, Արցախում, Ջավախքում եւ սփյուռքում: Տարվա շրջանակում կանցկացվի գիտաժողով, կլինեն նկարների ցուցադրություն, ինչպես նաեւ կթողարկվեն հուշադրամներ, նամականիներ:

Թ. Պողոսյանն անելու է ամեն ինչ, 2012-ը Սայաթ-Նովայի տարի հռչակելու եւ Սայաթ-Նովայի փողոցն ամբողջ տարի տոնական հանդերձների մեջ պահելու համար: Իսկ միջոցառումների Ֆինանսավորման հարցով` Պողոսյանի հույսն Աստծո եւ հայրենիքի վրա է:

Հանդիպմանը ներկա աշուղ Աստղանուշը ներկաներին ողջունեց իր ասմունքով: Տեսանյութը կարող եք դիտել այստեղ