ՀՐԱՊԱՐԱԿ. Խալաֆյանի գործն ավարտվեց

Երեկ Կոտայքի մարզի ընդհանուր իրավասության դատարանն ավարտեց Վահան Խալաֆյանի գործի քննությունը: Դատավոր Մեսրոպ Մակյանը հրապարակեց դատավճիռը, որով Չարենցավանի ոստիկանության քրեական հետախուզության բաժնի նախկին պետ Աշոտ Հարությունյանը, ով մեղադրվում էր Խալաֆյանին ինքնասպանության հասցնելու մեջ, դատապարտվեց 8 տարվա ազատազրկման, օպերլիազոր Մորիս Հայրապետյանը՝ 2 տարի պայմանական ազատազրկման, իսկ մյուս երկու օպերլիազորներ Գագիկ Դավթյանին և Գագիկ Ղազարյանին դատարանն արդարացրեց, այն դեպքում, երբ Խալաֆյանը մինչ մահը եղել է վեչջիններիս սենյակում:

Հիշեցնենք, որ Վահան Խալաֆյանը, ով ապրիլի 13-ին ոստիկանության բաժին բերման էր ենթարկվել գողության կասկածանքով, ըստ պաշտոնական վարկածի, խոշտանգումների էր ենթարկվել ոստիկանների կողմից, ինչի հետևանքով 24-ամյա երիտասարդն ինքնասպան էր եղել՝ դանակի 2 հարված հասցնելով ինքն իրեն: Սա պաշտոնական վարկածն է, սակայն տուժողի հարազատներն ու բարեկամները, ինչպես նաև իրավապաշտպանները համոզված են, որ Խալաֆյանը սպանվել է ոստիկանների ձեռքով: