Արցախում հանցագործությունները նվազել են

Այս տարվա առաջին 9 ամիսների ընթացքում Արցախում գրանցվել է 351 հանցագործություն` նախորդ տարվա նույն ժամանակահատվածի համեմատ նվազելով 21.5 տոկոսով:

Այս մասին հայտարարվել է օրերս ԼՂՀ դատախազության կոլեգիայում, որտեղ քննարկվել են 2010թ. 9 ամսում դատախազության մարմինների կատարած աշխատանքի արդյունքները:

Հաշվետու ժամանակահատվածում գրանցվել է միջին ծանրության` 74 (2009թ. 9 ամսում` 111), ծանր` 134 (2009թ. 9 ամսում` 128), առանձնապես ծանր` 8 (2009թ. 9 ամսում` 11) հանցագործություններ:

Ըստ վերլուծությունների` մարդու դեմ ուղղված հանցագործությունները անցած տարվա նույն ժամանակահատվածի համեմատ նվազել են 34 դեպքով: Դրան զուգընթաց բարձրացել են բացահայտման ցուցանիշները: Սակայն, 2009թ. նույն ժամանակահատվածի համեմատ արձանագրվել է առանձին տեսակի հանցագործությունների աճ` սպանության փորձ` 1 դեպք (անցած տարի` 0):

2009 թվականի նույն ժամանակահատվածի համեմատ այս տարվա առաջին 9 ամիսների ընթացքում արձանագրվել է ճանապարհա-տրանսպորտային պատահարների 7 դեպքով աճ, որի արդյունքում մահացել է 11 մարդ` նախորդ տարվա նույն ժամանակահատվածի 2-ի դիմաց:

Այս առիթով իր մտահոգությունն է արտահայտել նաեւ ԼՂՀ գլխավոր դատախազ Արշավիր Ղարամյանը, ով հանձնարարել է ուսումնասիրել վերջին տարիների պրակտիկան, առանձնապես պատժողական քաղաքականության մասով, եւ անհրաժեշտ միջոցներ ձեռնարկել: