Վրաստանի վարչապետը բաց նամակով դիմել է Ուրսուլա ֆոն դեր Լայենին, Անտոնիու Կոշտաին և Ռոբերտա Մեցոլաին

Վրաստանի վարչապետ Իրակլի Կոբախիձեն բաց նամակով դիմել է Ուրսուլա ֆոն դեր Լայենին, Անտոնիու Կոշտաին և Ռոբերտա Մեցոլաին.

«Ինչպես ձեզ հայտնի է, Վրաստանը եվրոպական արժեքների վրա հիմնված երկիր է, որտեղ մարդու արժանապատվությունը, հումանիզմը, ազատությունն ու ազգային ինքնությունը ոչ թե հռչակված սկզբունքներ են, այլ դարերի ընթացքում ձևավորված և արմատացած արժեքներ։ Պատմականորեն, մշակութային և արժեքային առումով Վրաստանը եվրոպական տարածքի մաս է կազմում և միաժամանակ հանդիսանում է Եվրամիության անդամակցության թեկնածու երկիր, որը ձգտում է դառնալ եվրոպական ընտանիքի լիարժեք անդամ։

Ցավոք, եվրոպական բյուրոկրատիայի կողմից Վրաստանի նկատմամբ ընդունված որոշման հետևանքով՝ ձեր նախաձեռնությամբ միակողմանիորեն դադարեցվեց քաղաքական երկխոսությունը մեր երկրի հետ, ինչից հետո բազմիցս մերժվեցին մեր առաջարկած քննարկումների և համագործակցության ձևաչափերը։ Ստեղծված իրավիճակը հաշվի առնելով՝ ստիպված ենք ձեզ հրապարակայնորեն դիմել բաց նամակով։ Մենք բազմիցս նշել ենք, որ Վրաստանի ձգտումը դեպի Եվրամիություն պայմանավորված չէ միայն ձևական ինտեգրման ցանկությամբ։ Մեր ժողովրդի համար Եվրոպան առաջին հերթին արժեքային և քաղաքակրթական տարածք է՝ մեր նախնիների ընտրությունը, որը հիմնված է քրիստոնեական բարոյականության, ազատության, հավասարության, մարդու իրավունքների հարգանքի և ժողովրդավարական սկզբունքների վրա։

Մեզ համար Եվրամիությունը ընդհանուր եվրոպական քաղաքակրթական տարածք է, միավորում, որը պատկանում է ոչ թե առանձին քաղաքական գործիչների, եվրոպացի առաջնորդների կամ եվրոբյուրոկրատների, այլ եվրոպացի ժողովուրդներին, այդ թվում՝ վրաց ժողովրդին։ Այս ֆոնին, որպես եվրոպական քաղաքակրթության մաս և Եվրամիության անդամակցության թեկնածու երկիր, մենք հարցեր ունենք այն մտահոգիչ իրադարձությունների վերաբերյալ, որոնք տեղի ունեցան Եվրոպայի սրտում՝ Դանիայի մայրաքաղաք Կոպենհագենում, և որոնք, մեր կարծիքով, ոչ մի կապ չունեն ոչ Եվրոպայի, ոչ էլ եվրոպական արժեքների հետ։

Տիկին Ուրսուլա, պարոն Անտոնիու, տիկին Ռոբերտա, ձեզ՝ որպես Եվրամիության բարձրագույն ինստիտուտների ներկայացուցիչների, հարց ենք ուղղում․ ինչպե՞ս եք գնահատում այն բռնությունը, որը տեղի ունեցավ Կոպենհագենում, երբ խաղաղ ցույցի մասնակիցների նկատմամբ նախ կիրառվեցին մահակներ, ապա նաև ոստիկանությունը նրանց դեմ օգտագործեց շներ։ Այն ծանր կադրերը, որոնցում երևում է, թե ինչպես է ոստիկանությունը դաժանորեն ցրում խաղաղ ցուցարարներին, միջազգային հանրությանը հստակ ցույց տվեցին մտահոգիչ իրականություն․ եթե տարիներ շարունակ Եվրոպան համարվում էր ժողովրդավարության, մարդու իրավունքների, խոսքի և արտահայտման ազատության, ինչպես նաև այլ հիմնարար արժեքների պաշտպանության օրինակ, այսօր ավելի ու ավելի ակնհայտ է դառնում հակառակ միտումը։ Ստեղծված իրավիճակը վտանգ է ստեղծում, որ Եվրոպան կարող է դառնալ ոչ թե այդ արժեքների պաշտպանության, այլ դրանց անտեսման և կոպիտ խախտման օրինակ։

Վրաստանի համար, ինչպես ցանկացած երկրի, որը հավատարիմ է ժողովրդավարական արժեքներին, կատեգորիկ անընդունելի է ինչպես այն բռնությունը, որ տեսանք Կոպենհագենում, այնպես էլ այն փաստը, որ Եվրամիությունն այլևս չի պաշտպանում այն հիմնարար սկզբունքները, որոնց վրա հիմնադրվել է։ Այս ամենը հաշվի առնելով՝ բնականաբար հարցեր են առաջանում, այդ թվում՝ համապատասխանո՞ւմ են արդյոք նման բռնի գործողությունները ժողովրդավարության և մարդու իրավունքների այն չափանիշներին, որոնց հավատարմությունը Եվրամիությունը մշտապես շեշտում է և որոնց ձգտում էին աշխարհի երկրները։ Որպես Եվրամիության բարձրաստիճան պաշտոնյաներ՝ ինչպե՞ս եք կարծում, ուր են տանում Եվրոպային այն գործընթացները, որոնք կապված են ժողովրդավարական հետընթացի, տնտեսական ստագնացիայի, միգրացիոն ճգնաժամի, պատմական հիշողության արժեզրկման, ազգային և սեռային ինքնությունների թուլացման և հասարակական ինքնության քայքայման հետ։

Ինչպե՞ս հայտնվեց Եվրոպան, որը համարվում էր զարգացման, ազատության և ժողովրդավարության օրինակ ամբողջ աշխարհի համար, այսպիսի խոր արժեքային ճգնաժամում, և ընդհանրապես՝ ո՞ւր է տանում Եվրամիությունն այս ճանապարհը։ Ցավալի և մտահոգիչ փաստ է, որ այսօր Եվրամիությունը հաճախ անտեսում է հասարակությունների բնական, մշակութային և պատմական հիմքերը։ Ստեղծվում է տպավորություն, որ եվրոպական տարածքը աստիճանաբար հեռանում է այն սկզբունքներից, որոնք այն դարձրել էին ժողովրդավարության և մարդու իրավունքների պաշտպանության խորհրդանիշ։

Վրաստանը՝ որպես եվրոպական, Եվրամիության անդամակցության թեկնածու երկիր, ձեզանից հստակ պատասխան է ակնկալում՝ ինչ ծրագիր ունի Եվրամիությունը, ինչ ուղղությամբ են զարգանում գործընթացները միության ներսում և որն է լինելու այս մտահոգիչ գործընթացների վերջնական արդյունքը՝ գործընթացների, որոնց մասին հրապարակայնորեն խոսում ենք ոչ միայն մենք, այլև եվրոպական այլ երկրների բնակիչներն ու քաղաքական առաջնորդները»։

Տեսանյութն՝ այստեղ։

Աղբյուրը՝ Vector News