Իսրայելն աջակցում է Իրանի վերաբերյալ Թրամփի որոշմանը. Նեթանյահուի գրասենյակ

Իսրայելն աջակցում է ԱՄՆ նախագահ Դոնալդ Թրամփի՝ Իրանին ուղղված հարվածները երկու շաբաթով դադարեցնելու որոշմանը։ Այս մասին ասվում է Իսրայելի վարչապետ Բենիամին Նեթանյահուի գրասենյակի տարածած հայտարարության մեջ։

«Իսրայելը պաշտպանում է նախագահ Թրամփի որոշումը Իրանին հարվածները երկու շաբաթով դադարեցնելու մասին՝ պայմանով, որ Իրանն անմիջապես կբացի նեղուցները և կդադարեցնի բոլոր հարձակումները ԱՄՆ-ի, Իսրայելի և տարածաշրջանի երկրների ուղղությամբ»,- Times of Israel-ի հաղորդմամբ՝ ասված է հայտարարության մեջ:

Նշվում է նաև, որ Իսրայելն աջակցում է ԱՄՆ-ի այն քայլերին, որոնք ուղղված են ԱՄՆ-ի, Իսրայելի և արաբական երկրների համար «միջուկային, հրթիռային և ահաբեկչական» սպառնալիքի կասեցմանը, որն իբրև թե գալիս է Իրանից:

«Միացյալ Նահանգներն Իսրայելին հավաստիացրել է, որ առաջիկա բանակցությունների ընթացքում հավատարիմ է մնալու այդ նպատակներին հասնելուն, որոնք ընդհանուր են ԱՄՆ-ի, Իսրայելի և տարածաշրջանում Իսրայելի դաշնակիցների համար»,- հայտնում է Նեթանյահուի գրասենյակը:

Հիշեցնենք՝ Իրանի ազգային անվտանգության բարձրագույն խորհրդում հայտարարել են ԱՄՆ-ի հետ հակամարտությունում հաղթանակի մասին, քանի որ Թեհրանը ստիպել է ԱՄՆ-ին ընդունել իր 10 կետից բաղկացած ծրագիրը: