Իսրայելն աջակցում է նեոնացիստներին. ՌԴ ԱԳՆ

ՌԴ ԱԳՆ-ն «հակապատմական» է անվանել Իսրայելի արտգործնախարար Յաիր Լապիդի հայտարարությունները, որը նախօրեին Ռուսաստանից ներողություն է պահանջել Սերգեյ Լավրովի այն խոսքերի համար, որ գուցե «Ադոլֆ Հիտլերը նույնպես հրեական արյուն ունի». գրում է «Կոմերսանտը»։

«Մենք ուշադրություն ենք դարձրել Իսրայելի ԱԳՆ ղեկավարի հակապատմական հայտարարություններին, որոնք հիմնականում բացատրում են Իսրայելի ներկայիս կառավարության ուղեգիծը Կիևում նեոնացիստական ռեժիմին աջակցելու ուղղությամբ»,- ասվում է ՌԴ ԱԳՆ հայտարարության մեջ։

Ռուսական գերատեսչությունը պնդում է, որ «պատմությունը, ցավոք, գիտի հրեաների և նացիստների համագործակցության ողբերգական օրինակները»։ Ըստ ՌԴ ԱԳՆ-ի՝ Վլադիմիր Զելենսկին «շահարկում է իր արմատները» և «ծածկվում իր ծագման հետևում ու դրանով ծածկում բնական նեոնացիստներին»։

«Նախագահի հրեական ծագումը երկրում մոլեգնող նեոնացիզմից պաշտպանվելու երաշխիք չէ։ Ուկրաինան, ի դեպ, հիմա միակը չէ, որ այսպիսին է. Լատվիայի նախագահ Լևիցը նույնպես հրեական արմատներ ունի։ Եվ նա նաև «հաջողությամբ» քողարկում է իր երկրում Waffen SS-ի վերականգնումը»,- ասել է ՌԴ ԱԳՆ-ն՝ մեկնաբանելով Լատվիայի պաշտպանության նախարար Արտիս Պաբրիկսի կոչը՝ հարգել լատվիական Waffen SS լեգեոնի անդամների հիշատակը, որոնք ընկել են մարտերում:

Ավելի վաղ ՌԴ ԱԳ նախարար Սերգեյ Լավրովը իտալական Mediaset հեռուստաընկերությանը տված հարցազրույցում, մասնավորապես, հայտարարել էր. «Այն փաստը, որ ինքը (Զելենսկին) որպես փաստարկ է ներկայացնում` «ինչպես կարող ենք ունենալ ազգայնականացում, եթե ես հրեա եմ»: Եթե ճիշտ եմ հիշում, վախենում եմ սխալվել, բայց, իմ կարծիքով, Հիտլերն էլ հրեական արյուն ուներ։ Դա բացարձակապես ոչինչ չի նշանակում։ Եվ մենք վաղուց լսել ենք, որ իմաստուն հրեա ժողովուրդն ասում է, որ ամենամոլի հակասեմականները, սովորաբար, հրեաներն են: «Ընտանիքն ունի իր սև ոչխարները», ինչպես մերոնք են ասում…»: