Մենք երկխոսության մեջ ենք Իրանի հետ և կշարունակենք այն․ Պեսկով

Ռուսաստանը շարունակում է երկխոսությունը Իրանի հետ։ Այս մասին հայտարարել է Ռուսաստանի նախագահի մամուլի քարտուղար Դմիտրի Պեսկովը՝ պատասխանելով Մոսկվայի կողմից Թեհրանին տրամադրվող աջակցության մասին հարցին, որը քաղաքական աջակցությունից դուրս է, տեղեկանում ենք vedomosti.ru-ից։

«Մենք երկխոսության մեջ ենք իրանական կողմի հետ և մենք անպայման կշարունակենք այս երկխոսությունը», - ասել է նա։

NBC News-ի հարցին, թե արդյոք Ռուսաստանը և Իրանը համագործակցում են ռազմական առումով, Պեսկովը պատասխանել է.

«Դա այն ամենն է, ինչ ես ուզում էի ասել այս թեմայով»։

Նախորդ օրը Իրանի արտաքին գործերի նախարար Աբբաս Արաղչին ամերիկյան հեռուստաալիքին տված հարցազրույցում հայտարարել էր, որ Մոսկվան և Պեկինը շարունակում են քաղաքական աջակցություն ցուցաբերել Թեհրանին։ Արաղչին, սակայն, ասել է, որ չի բացահայտի այլ երկրների հետ համագործակցության մանրամասները։

Պեսկովը մարտի 5-ին հայտարարել է, որ Ռուսաստանը Իրանից օգնության որևէ խնդրանք չի ստացել։