Միքայել Սրբազանի օրհնությամբ ուխտերթ՝ Սուրբ Հակոբ եկեղեցուց դեպի Սուրբ Ամենափրկիչ եկեղեցի

Շիրակի Թեմի առաջնորդ Գերաշնորհ Տեր Միքայել արքեպիսկոպոս Աջապահյանի օրհնությամբ՝ հուլիսի 26-ին, ժամը՝ 17:00-ին, Գյումրիում տեղի կունենա Մեր Տեր և Փրկիչ Հիսուս Քրիստոսի Պայծառակերպության տոնին ընդառաջ Ուխտերթ Սուրբ Հակոբ եկեղեցուց դեպի Սուրբ Ամենափրկիչ եկեղեցի:

«Սիրելի՛ ժողովուրդ, Մայր Եկեղեցին կանչում է իր հավատավոր զավակներին մասնակցելու այս հոգևոր ուխտագնացությանը և մեր ուխտի նորոգության հերթական հնարավորությանը: Մեր հայրենիքի և ազգի առաջ ծառացած այս դժվարին ժամանակներում՝ մենք բոլորս կոչված ենք հրաժարվելու չարությունից, պայքարելու մեր մեղքերի դեմ, հայտնապես վկայելու մեր Տեր Հիսուս Քրիստոսին և համախմբվելու մեր Փրկչի շուրջ:

Ուխտերթին կնախորդի ժամերգություն Սուրբ Հակոբ եկեղեցում, ընդհանրական խոստովանություն՝ ժամը՝ 17:00-ին: Այնուհետև հոգևոր հայրերի առաջնորդությամբ եկեղեցու բակում կկատարվի անդաստան արևելյան կողմն աշխարհի, հոգևոր պատգամ հոգևորականի կողմից:

Թափորի հաջորդ հանգրվանը կլինի Սուրբ Գրիգոր Լուսավորիչ եկեղեցու մոտ, որտեղ կկատարվի անդաստան արևմտյան կողմն աշխարհի և քարոզ:

Ուխտերթի մյուս հանգրվանը կլինի Սուրբ Աստվածածին Մայր եկեղեցու (Յոթ Վերք) մոտ, որտեղ կկատարվի անդաստան հարավային կողմն աշխարհի և քարոզ:

Վերջին կանգառը Սուրբ Ամենափրկիչ եկեղեցու մոտ կլինի, որտեղ կկատարվի անդաստան հյուսիսային կողմն աշխարհի և մուտք եկեղեցի, որտեղ Միասնական աղոթքից՝ Հանգստյան ժամերգությունից հետո կլինի արձակում:

Սիրելի՛ քրիստոնյաներ, եկե՛ք այս մտածումներով ու զղջումով վերանորոգենք մեր Ուխտը Տեր Հիսուս Քրիստոսի հետ և միասին Գյումրու Սուրբ Հակոբ Մծբնեցի եկեղեցուց մեր քայլերն ուղղենք դեպի Շիրակի թեմի Սուրբ Ամենափրկիչ եկեղեցի: Վկայենք մեր հավատքն ու նվիրումն առ Տեր Հիսուս Քրիստոս»,- նշում եմ Շիրակի թեմից։