Տիկին դեսպանին առաջարկեցի Նիդերլանդներից Շիրակ հրավիրել կաթնարդյունաբերության ոլորտի մասնագետների. Վարդան Ղուկասյան

Տիկին դեսպանին առաջարկեցի Նիդերլանդներից Շիրակ հրավիրել կաթնարդյունաբերության ոլորտի մասնագետների՝ օգնելու զարգացնել շիրակցի ֆերմերների հմտությունները, իսկ վերջինս առաջարկ արեց Գյումրիում բացել հոլանդական հացաբուլկեղենի արտադրամաս։ Այս մասին տեղակացնում է Գյումրու քաղաքապետ Վարդան Ղուկասյանի պաշտոնական էջը:

«Այսօր ճանաչողական այցով Գյումրիում էր Հայաստանի Հանրապետությունում Նիդերլանդների Թագավորության արտակարգ և լիազոր դեսպան Մարիկե Մոնրոյ-Վինթերը:

Տիկին Մոնրոյ-Վինթերին համայնքապետարանում հանդիպեց Գյումրի համայնքի ղեկավար Վարդան Ղուկասյանին: Համայնքի ղեկավարի եւ դեսպանի միջև ծավալվեց ջերմ, կառուցողական զրույց, Գյումրիում փոքր եւ միջին բիզնես զարգացնելու, նոր ներդրումներով հանդես գալու առաջարկներ եղան:

Քանի որ Գյումրու հարակից համայնքներում ազգաբնակչության հիմնական զբաղմունքը հողագործությունն ու անասնապահությունն է, Գյումրու համայնքապետը դեսպանի ուշադրությունը հրավիրեց հենց այդ ոլորտին՝ առաջարկելով Նիդերլանդներից Գյումրի կաթնարդյունաբերության ոլորտի մասնագետներ հրավիրել: Տիկին Մոնրոյ-Վինթերն էլ Գյումրիում հացաբուլկեղենի արտադրամաս ստեղծելու իր առաջարկն արեց:

Հանդիպման ավարտին Գյումրի համայնքի ղեկավար Վարդան Ղուկասյանը Նիդերլանդների Թագավորության արտակարգ և լիազոր դեսպան Մարիկե Մոնրոյ-Վինթերին նվիրեց գյումրվա մուշուրբան՝ կլկլանը»,- նշված է հաղորդագրության մեջ: