Ռուսաստանը պատրաստ է բարելավել հարաբերությունները Վրաստանի հետ. Պեսկով

Ռուսաստանը պատրաստ է քայլեր ձեռնարկել Վրաստանի հետ հարաբերությունները կարգավորելու համար։ Այդ մասին լրագրողների հետ զրույցում ասել է ՌԴ նախագահի մամուլի քարտուղար Դմիտրի Պեսկովը։

«Հստակ ժամկետներ չկան, բայց այն, որ Ռուսաստանն իսկապես պատրաստ է քայլեր ձեռնարկել հարաբերությունները կարգավորելու համար, այն իրոք այդպես է: Մենք շահագրգռված ենք լավ հարաբերություններ կառուցել բոլոր երկրների հետ, որոնք պատրաստ են դրան, և որոնք ցանկանում են դա»,-«ՌԻԱ նովոստի» -ի փոխանցմամբ, ասել է Պեսկովը:

Ավելի վաղ «Известия»-ին տված հարցազրույցում ՌԴ փոխարտգործնախարար Միխայիլ Գալուզինը հայտարարել էր, որ Մոսկվան ափսոսում է, որ Թբիլիսին դիվանագիտական ​​հարաբերությունների վերականգնումը կապում է Աբխազիայի և Հարավային Օսիայի վերաբերյալ իր դիրքորոշման հետ, սակայն պատրաստ է փոխշահավետ համագործակցություն զարգացնել վրացական կողմի հետ։