Միջուկային զսպման ուժերի վարժանք ՌԴ–ում. մեկնարկն ազդարարել է Պուտինը

Ռուսաստանի նախագահ Վլադիմիր Պուտինը Կրեմլի իրավիճակային կենտրոնից ազդարարել է միջուկային զսպման ուժերի վարժանքի մեկնարկը։ Տեղեկությունը հայտնում է ՌԻԱ Նովոստին։

«Այսօր մենք զսպման (միջուկային. խմբ.) ռազմավարական ուժերի հերթական վարժանքն ենք անցկացնում: Կմշակենք պաշտոնյաների գործողությունները բալիստիկ և թևավոր հրթիռների գործնական կիրառման դեպքում», – ասել է ՌԴ նախագահը։

Պուտինն ընդգծել է, որ միջուկային զենքի օգտագործումն անվտանգության ապահովման ծայրահեղ միջոց է: Նա նշել է, որ դա Մոսկվայի սկզբունքային դիրքորոշումն է։

Միևնույն ժամանակ հենց «միջուկային եռյակն» է շարունակում մնալ Ռուսաստանի ինքնիշխանության և անվտանգության հուսալի երաշխավորը, թույլ է տալիս լուծել ռազմավարական զսպման խնդիրները, ինչպես նաև աշխարհում պահպանել միջուկային հավասարություն և ուժերի հավասարակշռություն:

«Ընդգծեմ, որ մենք չենք պատրաստվում ներքաշվել սպառազինությունների նոր մրցավազքի մեջ։ Սակայն միջուկային ուժերին կաջակցենք անհրաժեշտ մակարդակով», – նշել է Ռուսաստանի ղեկավարը։

Աշխարհում աճող լարվածությունն ու նոր արտաքին սպառնալիքների ի հայտ գալը ցույց են տալիս ժամանակակից և մշտապես մարտական կիրառման պատրաստ զսպման ուժերի առկայության կարևորությունը։

«Այդ պատճառով Մոսկվան կշարունակի կատարելագործել դրանց բոլոր բաղադրիչները, երկիրը դրա համար ռեսուրսներ ունի»,– ընդգծել է ՌԴ նախագահը։
Այսպես` սպառազինության պետական ծրագրի համաձայն` ռազմավարական նշանակության հրթիռային զորքերը հետևողականորեն կհամալրվեն ստացիոնար և շարժական նոր, ավելի բարձր ճշգրտություն, արձակման նախապատրաստման կրճատված ժամանակ ունեցող և հակահրթիռային պաշտպանության հաղթահարման մեծացված հնարավորություններով օժտված հրթիռային համալիրներով:

Բացի այդ, Պուտինի խոսքով, շարունակվում է ռազմածովային նավատորմի կազմում նորագույն ատոմային սուզանավերի ընդգրկումը, ինչպես նաև ռազմավարական ռմբակոծիչների արդիականացումը: