Իսրայելը Գուտերեշին պերսոնա նոն գրատա է հայտարարել և արգելել նրա մուտքը երկիր

Իսրայելի արտաքին գործերի նախարարը ՄԱԿ-ի գլխավոր քարտուղար Անտոնիո Գուտերեշին անցանկալի անձ է հայտարարել և արգելել է նրա մուտքը երկիր: Այս մասին հայտնում է Իսրայելի արտաքին քաղաքական գերատեսչության մամուլի ծառայությունը։

Նախօրեին Անտոնիո Գուտերեշը Իսրայելի դեմ Իրանի հարձակման ֆոնին հանդես է եկել Մերձավոր Արևելքում հակամարտության ընդլայնման դատապարտմամբ և հրադադարի կոչ է արել:

«Իսրայելի արտաքին գործերի նախարար Կացն այսօր հայտարարել է, որ ՄԱԿ-ի գլխավոր քարտուղար Անտոնիո Գուտերեշին պերսոնա նոն գրատա է հայտարարել Իսրայելում՝ արգելելով նրա մուտքը երկիր: Այս որոշումը կայացվել է հաշվի առնելով Գուտերեշի արձագանքը Իսրայելի վրա Իրանի հարձակմանը, երբ նա միանշանակ չի դատապարտել այդ լուրջ ագրեսիան»,- ասվում է հայտարարության մեջ։