Քրիստոֆ Շտրասերն էլ է Ադրբեջանի համար պերսոնա նոն գրատա

ԵԽԽՎ քաղբանտարկյալների գծով զեկուցող Քրիստոֆ Շտրասերը երեկ Վեհաժողովի քննարկմանն է ներկայացրել իր հեղինակած` «Ադրբեջանի քաղբանտարկյալների գծով հաջորդական միջոցներ» զեկույցը. գրում է «Առավոտը»:

Թերթի տեղեկացմամբ` զեկույցի հեղինակը նշում է, որ չնայած գործադրված ջանքերին` Ադրբեջանում քաղբանտարկյալների հարցը դեռեւս լուծված չէ: Ավելին` Ք. Շտրասերը ներկայացնում է Ադրբեջանում քաղբանտարկյալների հարցով նոր դեպքեր, որոնց շարքում են մի շարք ընդդիմադիր քաղաքական գործիչների ու ակտիվիստների, լրագրողների, բլոգերների ու խաղաղ ցույցերի մասնակիցների տեւական ազատազրկումները:

Շտրասերը հիշեցրել է նաեւ, որ իրեն Ադրբեջանի իշխանությունները թույլ չեն տվել մուտք գործել երկիր` ուսումնասիրություններ կատարելու համար, եւ իր զեկույցն ինքը կազմել է տարբեր ՀԿ-ների ներկայացրած տվյալների հիման վրա: Ըստ Շտրասերի` այս պահին Ադրբեջանում կա 85 քաղբանտարկյալ, որոնց անունները նա զեկույցում մեկ առ մեկ թվարկում է: