Հաշտությունը զոհաբերություն է պահանջում՝ վասն ընդհանրականի․ Բագրատ Սրբազան

Հայաստանի ու Արցախի հետ կապված բոլոր գործընթացները գործող իշխանությունները ժողովրդից թաքուն՝ մթության քողի տակ են տարել, շարունակաբար խաբել են ժողովրդին։ Այդ մասին ասաց Բագրատ Սրբազանը՝ Նեմեսիս» գործողության հերոսների հիշատակը հավերժացնող հուշակոթողի մոտ դասախոս-գիտնականների հետ հանդիպման ժամանակ։

«Պետք է  կասեցնենք ստի այս «շքերթը», որը մխրճել են հանրային կյանքի մեջ»,- ասաց Սրբազանը՝ դասախոսներին համարելով այս առաքելությունն իրականացնող կարևոր օղակ։

«Մեր այս շարժումը Ճշմարտության հաղթանակի մասին է։ Պիտի հաղթանակի Ճշմարտությունը, այլ կերպ չի կարող լինել։ Այսքան ներուժ ունեցող երկիրը, ժողովուրդը ինչպե՞ս կարող է այսքան մոլորված վիճակում մնալ։ Մոլորված՝ բառիս բուն իմաստով, նվաստացած, հարվածների տակ, անհանգիստ, թշնամությամբ, ատելությամբ»,- ասաց Սրբազանը՝ հավելելով՝ հաշտություն է պետք բերել։

«Բայց հիշեք՝ չկա հաշտություն՝ առանց արդարության և արդարադատության․ գոյություն չունի։ Եթե չեղավ դա, կլինի կեղծ։ Հաշտությունը զոհաբերություն է պահանջում»,- ասաց Սրբազանը։