Վաղը Գարիկ Գալեյանի գործով դատական նիստ է նշանակված

Հարգելի հայրենակիցներ, դեկտեմբերի 22-ին ժամը 14։00 -ին Նոր Նորքի և Ավանի ընդհանուր իրավասության դատարանում շարունակվելու է Գարիկ Գալեյանի գործով դատական նիստը: Հասցեն նույնն է` Գյուլիքեվխյան 20: Այս մասին տեղեկացնում են «Որդիների կանչ» ՀԿ–ից:

«Նիստը լինելու է բաց: Ակնկալում ենք բոլորիդ աջակցությունը»,- նշված է հայտարարության մեջ:

Նշենք, որ նոյեմբերի 2-ին Երևանի ընդհանուր իրավասության դատարանը 44–օրյա պատերազմում զոհված զինծառայող Մխիթար Գալեյանի հոր` «Որդիների կանչ» ՀԿ–ի անդամ Գարիկ Գալեյանի նկատմամբ խափանման միջոց կիրառեց տնային կալանքը երկու ամիս ժամկետով` համակցված գրավով։ Գրավի չափ է սահմանվել 2 մլն դրամը։

Դատավորը հենց դատարանի դահլիճից ազատ արձակեց Գալեյանին` նշելով, սակայն, որ այսօրվանից սկսած` նա չի կարող լքել իր բնակության վայրը։

Հիշեցնենք, որ 2023 թ. սեպտեմբերի 8-ին հայտնի դարձավ, որ Գալեյանը ձերբակալվել է։ Ավելի ուշ ՔԿ–ն հայտնեց, որ նրա մոտ 3 փաթեթ մարիխուանա է հայտնաբերվել։ Գալեյանի դեմ նախաձեռնվել է քրեական վարույթ ՀՀ քրեական օրենսգրքի 393-րդ հոդվածի 1-ին մասի հատկանիշներով։ Այն միացվել է ավելի վաղ Գալեյանի առնչությամբ ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում ՀՀ քրեական օրենսգրքի 195-րդ հոդվածի 2-րդ մասի 5-րդ կետով և 297-րդ հոդվածի 2-րդ մասի 1-ին կետով նախաձեռնված քրեական վարույթին։

Սեպտեմբերի 9–ին Երևանի ընդհանուր իրավասության առաջին ատյանի դատարանը բավարարեց քննիչի միջնորդությունը, և Գալեյանի նկատմամբ խափանման միջոց ընտրվեց երկամսյա կալանքը։

Դրանից փաստաբանը հայտնել էր, որ Գալեյանի ինքնազգացողությունը կտրուկ վատացել է և նրան տեղափոխել են հիվանդանոց: Սակայն, չնայած դրան, Վերաքննիչ դատարանը հոկտեմբերի 9-ին մերժեց նրա փաստաբանների միջնորդությունը խափանման միջոցը փոխելու վերաբերյալ։