կարևոր
3889 դիտում, 11 ամիս առաջ - 2023-08-10 16:12
Քաղաքական

Այս 8 ամսվա բլոկադան Նիկոլի ու Ալիևի համատեղ օպերացիան է արցախցիների դեմ. Արցախի ՀՅԴ-ական պատգամավոր․ Alphanews.am

Alphanews.am-ը զրուցել  է Արցախի Ազգային ժողովի ՀՅԴ խմբակցության ղեկավար Արթուր Մոսիյանի հետ․

Արցախի Ազգային ժողովի ՀՅԴ խմբակցության ղեկավար Արթուր Մոսիյանը Alpha News-ի եթերում պարզաբանել է, թե ինչու են ընդդիմադիր երեք խմբակցությունները համաձայնել խորհրդարանի նախագահի պաշտոնում ընտրել ՀՅԴ-ական պատգամավոր Դավիթ Իշխանյանին:

«Թե՛ ՀՅԴ-ն, թե՛ ընդդիմադիր մյուս երկու խմբակցությունները նշել են, որ Դավիթ Իշխանյանի նշանակումով կաշկանդված չեն Արցախի եւ Հայաստանի իշխանություններին վերաբերող գործելաոճի մեջ: Եվ եթե նպատակն այնպիսին է, որ համախմբում է պետք, եւ Դավիթ Իշխանյանի նշանակումը նոր ազդակ կհաղորդի Հայաստան-Արցախ-Սփյուռք եռամիասնության իմաստով, ապա ՀՅԴ-ն իր համաձայնությունն է տվել՝ այս ծանր ճգնաժամային իրավիճակում ստանձնել խորհրդարանի նախագահի պաշտոնը»,- ասել է Արթուր Մոսիյանը:

Պատգամավորն ընդգծել է, որ ստանձնելով այս պաշտոնը՝ ՀՅԴ-ն կոալիցիա չի կազմել Արցախի իշխանությունների հետ:

«Մենք շարունակելու ենք պնդել մեր պահանջները եւ Դավիթ Իշխանյանի նշանակումը պայմանավորված է երկրում ստեղծված իրավիճակով: Այդ պաշտոնը ստանձնելու առաջարկությունն արել է Արցախի նախագահն՝ իր «Ազատ հայրենիք- ՔՄԴ» խմբակցության միջոցով: Իրականությունը սա է, եւ ճիշտ չէր լինի դժվար պահին հրաժարվել օգնել, բայց դա որեւէ կերպ չի կարող ազդել Նիկոլ Փաշինյանի ու Արցախի գործադիր իշխանության հարցում ՀՅԴ-ի դիրքորոշման վրա»,- շեշտել է Մոսիյանը:

Ընդդիմադիր պատգամավորն անբավարար է գնահատել Արցախի նախագահի՝ օրեր առաջ տված հարցազրույցը, ընդգծելով, որ մեծ սպասելիքներ չուներ էլ այդ հարցազրույցից:

«Արցախի նախագահը բավարարվեց միայն հայտարարելով, որ ինքնորշման պայքարը շարունակելու ենք, որեւեւէ այլ արձագանք չեղավ: Ճիշտն ասած՝ մեծ սպասելիքներ մենք չունեինք էլ: Նա հորդորեց ՀՀ իշխանություններին՝ չանել այնպիսի հայտարարություն, որով Արցախը ճանաչում է Ադրբեջանի կազմում:

Արայիկ Հարությունյանը մոռացել է, որ Նիկոլ Փաշինյանը ոչ միայն հայտարարում է Արցախն Ադրբեջանի կազմում ճանաչելու մասին, այլեւ կոնկրետ քայլեր է անում եւ գործընթաց է սկսել իր ընկեր Ալիեւի հետ՝ Արցախն Ադրբեջանի կազմում թողնելու համար: Ամենայն պատասխանատվությամբ եմ ասում, որ այս 8 ամսվա բլոկադան Նիկոլի ու Ալիեի համատեղ օպերացիան է արցախցիների դեմ»,- ընդգծել է Արթուր Մոսիյանը: