Գիտակցւած ընտրութեան պատգամները

Թ. Հ. Թ. 17-րդ գումարման Պատգամաւորական ժողովի ընտրութիւններն արդէն յետեւում են: Այժմ, երբ աւարտւել է ընտրական գործընթացը, երբ թեհրանահայ ընտրողները կատարել են իրենց ընտրութիւնն ու պարզ են այդ ընտրութեան վերջնական արդիւնքները, անհրաժեշտ է անդրադառնալ կայացած ընտրութիւնների տողատակի յստակ պատգամներին:

Եւ այսպէս.

– Յունիսի 16-ին կայացած իր ընտրութեամբ թեհրանահայութիւնը բարձրաձայն յայտարարեց, որ. համայնքային կեանքում նախապատւութիւնը տալիս է յստակ ծրագրով եւ նպատակներով, կայունութեան հիմքի վրայ խարսխւած զարգացմանը եւ արդիականացմանը, այլ, ոչ թէ արկածախնդիր պոռոտախօսութեանը:

– Թեհրանահայութիւնը բարձրաձայն յայտարարեց, որ համայնքային կեանքի ղեկավարման համար անհրաժեշտ է փորձ, պատասխանատւութիւն եւ յանձնառութիւն, այլ, ոչ թէ մեծամիտ դատարկաբանութիւն:

– Թեհրանահայութիւնը բարձրաձայն յայտարարեց, որ համայնքային կեանքում, յստակ գաղափարական հէնք ունեցող հաւաքական ղեկավարումը չի կարող փոխարինւել սնապարծութեան վրայ հիմնւած անձնական ամբիցիաներով:

– Թեհրանահայութիւնը բարձրաձայն յայտարարեց, որ բարեգործութեան քողի ներքոյ չի կարելի գնել համայնքին՝ այն ծառայեցնելով սեփական ծրագրերի եւ նպատակների իրագործմանը:

– Թեհրանահայութիւնը բարձրաձայն յայտարարեց, որ համայնքային կեանքը չի կարելի չափել սեփական գրպանի տրամագծով, եւ որ չի արտօնում որեւէ մէկի, այն տեղաւորելու իր գրպանում:

– Թեհրանահայութիւնը բարձրաձայն յայտարարեց, որ չի պատրաստւում համայնքի օրէնսդիր ատեանը վստահել սեփական շահերից ելնելով, մէկ անձի շուրջ համախմբւած «մեծապատիւ մուրացկաններին», որոնց միակ ձեռքբերումը եօթը տիրոջ ծառայելն ու առանց բացառութեան եօթին էլ դաւաճանելն է:

Եւ, թերեւս, ամենակարեւորը.

– Թեհրանահայութեան ընտրութիւնը շառաչիւն ապտակ էր նիկոլիզմ կոչւող ախտին, եւ այդ ախտը կրողներին ու տարածողներին: Թեհրանահայ համայնքը բարձրաձայն յայտարարեց, որ համայնքային օրակարգին զուգահեռ, իր համար առանցքային նշանակութիւն ունի նաեւ ազգային օրակարգը, եւ մերժւած են այն բոլոր անձնաւորութիւնները, որոնք սատարում եւ աջակցում են հակազգային, դաւաճանական ուժերին, եւ օտարացած են ազգային արժէքային համակարգից:

Թեհրանահայութեան գիտակցւած ընտրութիւնը մէկ օրւայ ընթացքում ձեւաւորւած ընտրական վարքագծի դրսեւորումը չէր: Վերջին 3-4 տարիների ընթացքում, մեր համայնքային կեանքում տեղի ունեցած իրադարձութիւններին, թեհրանահայ ընտրողի արձագանգը հիմնաւորւած էր արմատ ունեցող պատմութեան, մեծ կենսափորձի, բարձր գիտակցութեան եւ ինտելեկտի, վաղւայ օրւայ նկատմամբ պատասխանատւութեան զգացողութեան եւ հնարաւոր աղէտը կանխելու հաւաքական վճռակամութեան վրայ:

Թեհրանահայ համայնքի ընտրութեան պատգամներն այն ուղենիշ փարոսներն են, որոնք լուսաւորելու են մեր համայնքային կեանքի առաջիկայ տարիների ընթացքը: Դրանցից շեղումը կը բերի փլուզման՝ համայնքային կեանքում: Սա պէտք է հասկանան բոլորը, ընտրութիւններում յաղթողները, եւ, մանաւանդ, պարտւողները: Մնացեալ բոլոր մեկնաբանութիւնները, արդարացումները եւ պատճառաբանութիւններն աւելորդաբանութեան ժանրից են:

«ԱԼԻՔ»ի խմբագրական