կարևոր
12637 դիտում, 1 տարի առաջ - 2023-03-17 20:57
Հասարակություն

«Բախտը մեկն է զինվորի՝ կամ մահ, կամ ազատություն». մարտի 17-ին լրացավ Կիմ Խաչատրյանի 28-ամյակը

«Բախտը մեկն է զինվորի՝ կամ մահ, կամ ազատություն». մարտի 17-ին լրացավ Կիմ Խաչատրյանի 28-ամյակը

Այսօր լրացավ արցախյան 44-օրյա պատերազմի մասնակից, ՀՅԴ Նիկոլ Աղբալյան ուսանողական միության անդամ, Արցախի «Մարտական Խաչ» երկրորդ աստիճանի շքանշանակիր Կիմ Խաչատրյանի 28-ամյակը։ 

ՀՅԴ «Նիկոլ Աղբալյան» ուսանողական միության անդամ, Հայկական բժշկական իստիտուտի 5-րդ կուրսի ուսանող Կիմ Խաչատրյանը զոհվեց Արցախի հյուսիսային դիրքերի պաշտպանության ժամանակ՝ հոկտեմբերի 31-ին: Նա առաջնագիծ էր մեկնել՝ ՀՅԴ կամավորական վաշտերից մեկի կազմում ընդգրկվելով։

Շնորհալի, կյանքում ազգային արժեքներով ու ավանդույթներով առաջնորդվող, հայրենիքն անսահման սիրող Կիմը ծնվել է 1995 թ. մարտի 17 ին՝ Վայոց ձորի մարզի Արենի գյուղում, 2001-2012 թթ. սովորել և ավարտել է Արենիի միջնակարգ դպրոցը։ 2013-2015 թթ. ծառայել ՀՀ զինված ուժերում (Մեղրիում)։ Նպատակ ուներ ուսումն ավարտելուց հետո մասնագիտական գործունեությունը ծավալել հայրենի գյուղում, հիմնել  ատամնաբուժարան։

Կիմի ծննդյան տարեդարձի առթիվ նրա շիրիմին էին այցելել դաշնակցական սերնդակից և ավագ ընկերները։

Փա՛ռք ու պատի՛վ քեզ, ընկեր Կիմ Խաչատրյան։

Ռազմաճակատ մեկնելու օրը Կիմը սոցցանցի իր էջում հրապարակել էր հետևյալ բանաստեղծությունը. 

Բախտը մեկն է զինվորի`

Կամ մահ, կամ ազատություն։

 

Վառոդդ պահիր միշտ պատրաստ ու չոր,

Նշանահատիկդ միշտ ճշտված պահիր,

Որ գնդակն անցնի ճիշտ սրտի միջով,

Եվ նրան հանձնի անաչառ մահին:

Կռվի մեջ չկա գթության խնդիր,

Եվ ոչ էլ խղճի գերակայություն,

Խղճիդ հետ երբեք դաշինք մի կնքիր

Այլապես խիղճդ կդառնա քեզ թույն:

 

Թշնամուցդ ավելի եղիր անողոք,

Լուծիր հնացող ցավը վրեժի,

Թող քեզ չհուզեն կական ու բողոք,

Երբ քո խնդիրը մահն է հրեշի:

 

Թող որ թշնամիդ անիծի զարկդ,

Ոսոխիդ մայրը թող քեզ նզովի,

Բազուկդ սակայն կօրհնի քո ազգը,

Եվ քաջությունդ երգով կգովի:

Ստորև ներկայացնում ենք «Երկիր մեդիա» հեռուստաընկերության մեր գործընկերների՝ Կիմի ծննդյան օրվա առիթով պատրաստած տեսանյութը: