կարևոր
6607 դիտում, 1 տարի առաջ - 2022-11-08 17:09
Տարածաշրջան

Վրաստանի երկակի ստանդարտները. հայերին արգելված է իրենց բողոքի ձայնը բարձրացնել, իսկ ադրբեջանցիներին թույլատրվում է նշել հակահայկական «տոնը»

Վրաստանի երկակի ստանդարտները. հայերին արգելված է իրենց բողոքի ձայնը բարձրացնել, իսկ ադրբեջանցիներին թույլատրվում է նշել հակահայկական «տոնը»

Այսօր` նոյեմբերի 8-ին Ադրբեջանում նշվում է այսպես կոչված «Հաղթանակի օր» հայատյաց տոնը: Սակայն Ադրբեջանը չի բավարարվել սեփական երկրում այդ «տոնը» նշելուց, և այն տեղափոխել է տարբեր երկրներ, որտեղ առկա է ադրբեջանական համայնք:

Այսպես, մեր հյուսիսային հարևան Վրաստանի մայրաքաղաք Թբիլիսիում, որտեղ ապրում են մեծ թվով հայեր, ադրբեջանցիները նշել են իրենց «տոնը»: Թբիլիսիի հանրային դպրոցում ադրբեջանցիները միջոցառում են անցկացրել` 44-օրյա պատերազմին նվիրված: Այս մասին տեղեկացնում է Վրաստանի Հայ Համայնք կազմակերպությունը:

Այստեղ ուշագրավ է վրացական իշխանությունների լուռ պահվածքը: Հիշեցնենք, որ սեպտեմբերի 18-ին Վրաստանի հայերը խաղաղ երթ էին իրականացնում դեպի Ադրբեջանի դեսպանատուն` իրենց օրինական բողոքի ձայնը բարձրացնելով Ադրբեջանի վայրագությունների դեմ: Սակայն վիրահայերի խաղաղ ակցիան հանդիպեց վրացական ոստիկանության բիրտ գործողություններին, որոնք չթույլատրեցին հայերին իրենց ակցիան իրականացնել. արդյունքում ձերբակալվեցին վիրահայոց համայնքի մի շարք ներկայացուցիչներ:

Ստացվում է, որ Վրաստանի իշխանություններն ավելի լոյալ դիրքորոշում ունեն ադրբեջանցիների, քան թե իրենց կրոնակից հազարամյա հարևան ժողովրդի նկատմամբ:

«Հարց է ծագում, արդյո՞ք մենք ապրում ենք երկակի ստանդարտներ ունեցող երկրում», - հարցադրում է անում «Վրաստանի Հայ համայնք» կազմակերպությունը: