Շվեդիայի պետական ​​հեռուստատեսությունը հարցազրույց է վերցրել քրդական YPG/PKK-ի առաջնորդներից մեկից` ի հեճուկս Թուրքիայի

Քրդական YPG-ի (PKK-ի սիրիական թեւ) առաջնորդներից Սալիհ Մուսլիմը հայտարարել է, որ իր կառույցի անդամներն ու զինակիցները վստահում են պաշտոնական Ստոկհոլմին։

Համապատասխան հայտարարությունն արվել է շվեդական SVT պետական հեռուստաընկերությանը տված հարցազրույցում, որը նա տվել է Սիրիայի հյուսիսում գտնվող ամերիկյան ռազմաբազաներից մեկում։

Մուսլիմը վստահություն է հայտնել, որ Շվեդիան երբեք YPG-ին չի ճանաչի որպես ահաբեկչական կազմակերպություն և զիջումների չի գնա Թուրքիային՝ ՆԱՏՕ-ին անդամակցելու համար։

Միաժամանակ, Մուսլիմը հրաժարվել է պատասխանել SVT-ի թղթակցի հարցին YPG-ի և PKK-ի միջև կապերի մասին։

Շվեդական հեռուստաալիքի օբյեկտիվում կախված են եղել PKK-ի առաջնորդ Աբդուլլահ Օջալանի լուսանկարները, ինչը զայրացրել է թուրքերին: