Թուրքիան թույլ չի տա տարածաշրջանում իր իրավունքների խախտում Հունաստանի կողմից

Թուրքիայի պաշտպանության նախարար Հուլուսի Աքարը կրկին մեղադրել է Հունաստանին Էգեյան և Միջերկրական ծովերում ու Կիպրոսի հարցում միջազգային իրավական նորմերը խախտելու մեջ։

«Մեր գործունեությամբ մենք միջազգային իրավունքի և երկխոսության կողմնակիցներ ենք: Մենք ցանկանում ենք լուծել առկա բոլոր խնդիրները խաղաղ ճանապարհով: Չնայած դրան՝ Հունաստանը շարունակում է իր ծավալապաշտական և ագրեսիվ քաղաքականությունը սադրիչ գործողություններով ու հայտարարություններով: Այնուամենայնիվ, մենք թույլ չենք տա, որ տիրող իրողությունները փոխվեն, բոլորի համար պետք է պարզ լինի, որ մենք պաշտպանելու ենք մեր իրավունքները մինչև վերջ և թույլ չենք տա, որ դրանք ոտնահարվեն»,- ասել է Աքարը:

Որպես օրինակ՝ նախարարը նշել է Հունաստանի «անմարդկային գործողությունները» միգրանտների նկատմամբ և ՆԱՏՕ-ի Tiger Meet զորավարժություններին մասնակցելու Թուրքիայի հրավերը չեղարկելու մասին Աթենքի որոշումը։

Զորավարժությունները Հունաստանում տեղի կունենան մայիսի 9-20-ը։ Նախատեսվում էր, որ Թուրքիայից դրանց կմասնակցեն F-16 կործանիչներ։ Հունաստանի գլխավոր ավիացիայի գլխավոր շտաբը հետ է կանչել Անկարայի հրավերը՝ թուրքական օդուժի կողմից Հունաստանի օդային տարածքի մշտական խախտումների պատճառով։