Իրանը բողոքի նոտա է հղել Աֆղանստանին

Իրանում Աֆղանստանի գործերի ժամանակավոր հավատարմատարը երեքշաբթի կանչվել է Իրանի ԱԳՆ։ ՏԱՍՍ-ի հաղորդմամբ՝ նրան բողոքի նոտա է հանձնվել և հայտարարվել Քաբուլում Իրանի դեսպանատան հյուպատոսական բաժնի աշխատանքը, մինչև հետագա ծանուցումը, դադարեցնելու մասին։

Ավելի վաղ Քաբուլում Իրանի դեսպանատան և Հերաթում գլխավոր հյուպատոսության մոտ հանրահավաքներ են տեղի ունեցել, քարկոծվել են դիվանագիտական ներկայացուցչությունները։ Իրանում Աֆղանստանի գործերի ժամանակավոր հավատարմատարին հիշեցրել են օտարերկրյա դիվանագիտական ներկայացուցչությունների անվտանգությունն ապահովելու՝ հյուրընկալող կառավարության պատասխանատվության մասին։ Իրանի ԱԳՆ-ն Աֆղանստանին կոչ է արել պատասխանատվության ենթարկել Իրանի դեսպանատան և գլխավոր հյուպատոսության վրա հարձակում գործած անձանց։