Էրդողանը գոհ է Փաշինյան-Ալիև հանդիպման արդյունքներից

Ադրբեջանի և Թուրքիայի նախագահներ Իլհամ Ալիևը և Ռեջեփ Թայիփ Էրդողանը հինգշաբթի հեռախոսազրույց են ունեցել, որի ընթացքում կողմերը քննարկել են երկկողմ համագործակցությունը և հայ-ադրբեջանական հարաբերությունների կարգավորման գործընթացը. հաղորդում է «Անադոլու»-n:

«Ապրիլի 7-ին նախագահ Ալիևը զանգահարել է նախագահ Էրդողանին։ Զրույցի ընթացքում կողմերը քննարկել են ապրիլի 6-ին Բրյուսելում ԵՄ-Ադրբեջան-Հայաստան ձևաչափով եռակողմ հանդիպումը։ Նախագահ Ալիևը դրական է գնահատել ձեռք բերված արդյունքները»,- ասվում է Ադրբեջանի նախագահի մամուլի ծառայության հաղորդագրությունում:

Ալիևը նշել է, որ բանակցություններից հետո պայմանավորվածություն է ձեռք բերվել աշխատանքային խմբի ստեղծման վերաբերյալ՝ Հայաստանի և Ադրբեջանի միջև խաղաղության պայմանագիր նախապատրաստելու համար՝ հիմնվելով Ադրբեջանի կողմից ներկայացված հիմնարար սկզբունքների վրա, «որոնք, ի թիվս այլ բաների, ներառում են  տարածքային ամբողջականության փոխադարձ ճանաչումը և տարածքային պահանջներից հրաժարվելը»։

«Էրդողանն, իր հերթին, գոհունակություն է հայտնել ձեռք բերված արդյունքների կապակցությամբ»,- ընդգծվում է տեղեկատվության մեջ։

«Զրույցի ընթացքում նշվել է, որ Հայաստանի և Ադրբեջանի միջև խաղաղության պայմանագրի ստորագրումը, տրանսպորտի և այլ հաղորդակցությունների բացումը կապահովեն խաղաղություն ու կայունություն տարածաշրջանում, կնպաստեն տարածաշրջանի երկրների զարգացմանը», - ասվում է զեկույցում։

«Պետությունների ղեկավարները մտքեր են փոխանակել նաև թուրք-ադրբեջանական երկկողմ դաշնակցային հարաբերությունների տարբեր ասպեկտների շուրջ»,- նշում է Ադրբեջանի նախագահի մամուլի ծառայությունը։