Ֆրանսիայի և Ռուսաստանի նախագահների հեռախոսազրույցը տևել է մոտ երկու ժամ

Ֆրանսիայի նախագահ Էմանուել Մակրոնը ՌԴ նախագահ Վլադիմիր Պուտինի հետ քննարկել է ուկրաինական ճգնաժամը։ Ինչպես գրում են ռուսական աղբյուրները՝ վկայակոչելով BFM հեռուստաալիքը, նախագահները խոսել են 1 ժամ 45 րոպե։

Վերջին 10 օրերի  ընթացքում դա նախագահների 4-րդ հեռախոսազրույցն է։ Ինչպես նշում է հեռուստաալիքը, 2021թ․ դեկտեմբերից մինչև հիմա նախագահները շփվել են 14 անգամ՝ ներառյալ Մոսկվայում տեղի ունեցած հանդիպումը։

Պուտինը Մակրոնին հայտարարել է, որ դեմ չէ ԱԷՄԳ-Ռուսաստան-Ուկրաինա ձեւաչափով հանդիպմանը, բայց ոչ Չեռնոբիլում, այլ տեսակոնֆերանսի ձեւաչափով կամ երրորդ երկրում։

Մակրոնին առաջարկվել է «ակտիվորեն աշխատել Կիեւի իշխանությունների հետ»՝ միջազգային հումանիտար իրավունքի նորմերը պահպանելու նպատակով: