Թուրքիան հայտարարել է, որ երկրում իրանական լրտեսական ցանց է բացահայտել

Թուրքիայի Ազգային հետախուզական կազմակերպության (MIT) և Ստամբուլի անվտանգության վարչության անցկացրած հատուկ գործողության ընթացքում ձերբակալվել է 14 կասկածյալ, որոնք աջակցել են իրանական հատուկ ծառայությունների՝ Թուրքիայում իրանցի ընդդիմադիր գործիչներին առևանգելու ծրագրերին. հայտնում է «Անադոլու» գործակալությունը։

Դատարանը ձերբակալվածների, այդ թվում՝ Թուրքիայի 12 և Իրանի 2 քաղաքացիների նկատմամբ խափանման միջոց է ընտրել կալանավորումը։ Լրտեսական ցանցի ևս երեք անդամի հետախուզում է հայտարարվել։

Անվտանգության աղբյուրների համաձայն՝ պարզվել է, որ By Saglam պաշտպանական ընկերության սեփականատեր Իհսան Սագլամը և նրա աշխատակից` Իրանի քաղաքացի Մորթեզա Սոլթան Սանջարին փորձել են ապօրինի կերպով իրանցի ընդդիմադիրներին Թուրքիայից դուրս բերել։

Իրանցի այլախոհներին առևանգելու համար Սագլամին և նրա հանցակիցներին վճարվել է 150 հազար դոլար։