Հայաստանի իշխանությունները ձգտում են բռնատիրության. Սեյրան Օհանյան

Ազգային ժողովի «Հայաստան» խմբակցության ղեկավար Սեյրան Օհանյանն ԱԺ ամբիոնից անդրադարձավ ընդդիմադիրների կալանավորումներին:

Նա հայտարարեց, որ ժողովրդավարական արժեքներ դավանող միջազգային հանրության աչքի առաջ Հայաստանի՝ ակնհայտ բռնատիրության ձգտող իշխանությունների գործողություններով ապօրինի կալանավորվում են համայնքի ղեկավարներ, ավագանու անդամներ, իշխանության անօրինական ցանկությունը չկատարող դատավոր, իշխանությանը քննադատողներ:

«Երեկ, առանց իրավական նոր հանգամանքերի ի հայտ գալու, կրկին կալանավորվեց Քաջարանի քաղաքապետ Մանվել Փարամազյանը։ Մենք դատապարտում ենք իշխանությունների ակնհայտ ապօրինի գործողությունները գործող քաղաքապետերի ու համայնքների ղեկավարների նկատմամբ»,- ասաց Օհանյանը:

Նա նշեց, որ այս պահին Վերաքննիչ քրեական դատարանում քննվում է քաղբանտարկյալ, Գորիսի քաղաքապետ Առուշ Առուշանյանի խափանման միջոցի հարցը: Սեյրան Օհանյանն ասաց, որ ընդդիմադիր երկու խմբակցությունների պատգամավորները գնում են դատարան՝ի աջակցելու Առուշ Առուշանյանին:

«Կոչ ենք անում մեր հայրենակիցներին՝ մասնակցել այս պայքարին՝ հանուն իրավական ու ժողովրդավարական Հայաստանի»,- ասաց «Հայաստան» խմբակցության ղեկավարը: