Ադրբեջանի զինված ուժերը պետք է անհապաղ և ամբողջությամբ դուրս բերվեն Հայաստանի Հանրապետության տարածքից. Եվրախորհրդարանի պատգամավորների նամակը

Եվրախորհրդարանի պատգամավոր, Բարեկամության խմբի նախագահ Լուկա Ֆուրլասի նախաձեռնությամբ նամակ է ուղարկվել Եվրահաննձնաժողովի ներկայացուցիչ Ժոզեֆ Բորելին կոչով՝ դադարեցնել եւ կանխել Հայաստանի Հանրապետության տարածքային ամբողջականության խախտումը, պահանջել Հայաստանի Հանրապետության ինքնիշխան տարածքից ադրբեջանական ուժերի անհապաղ և ամբողջական հեռացում։ Այս մասին հայտնում է ՀՅԴ Հայ դատի Եվրոպայի հանձնախումբը և շնորհակալություն հայտնում եվրապատգամավորին այս ջանքերի համար: Նամակը  ստորագրել է Եվրախորհրդարանի 33 պատգամավոր:

«Ցանկացած գործողություն կամ հռետորաբանություն, որն ուղղված է Հայաստանի Հանրապետության արևելյան և հարավային շրջաններում մարդկանց անվտանգությանը, խաղաղ, բնականոն կյանքին և մարդու իրավունքների խաթարմանը, պետք է անհապաղ դադարեցվի։

Մենք կոչ ենք անում ԵՄ արտաքին գործերի բաժնին օգտագործել իր բոլոր լծակները՝ կասեցնելու և կանխելու Հայաստանի Հանրապետության տարածքային ամբողջականության խախտումը, ինչպես նաև՝ պատերազմական հռետորաբանությունը»,- եզրափակել է պարոն Ֆուրլասն իր նամակում։