Ռուսաստանում ուղևորատար ինքնաթիռ է կործանվել

Ռուսական աերոակումբին պատկանող L-410 ինքնաթիռն ընկել է Մենզելինսկ քաղաքում՝ Թաթարստանում. հայտնում է ՏԱՍՍ-ը՝ արտակարգ իրավիճակների ծառայություններին հղումով:

Թեթև շարժիչով L-410 ինքնաթիռը, որում եղել է 23 մարդ, հիմնականում՝ դեսանտայիններ, ընկել է Մոսկվայի ժամանակով 09:11-ին:

Փրկարարներին հաջողվել է ինքնաթիռից դուրս բերել յոթ ողջ մնացածների, 16 մարդու ճակատագիրն անհայտ է: «Հրշեջ-փրկարարական ջոկատների կողմից ևս չորս հոգու հաջողվել է փրկել, աշխատանքները շարունակվում են: Ընդհանուր առմամբ, յոթ մարդ փրկվել է», - ՏԱՍՍ-ին ասել է գերատեսչության ներկայացուցիչը:

Աղբյուրը հավելում է նաև, որ ինքնաթիռը կործանվել է տեղի թռչող ակումբի օդանավակայանից թռիչքից անմիջապես հետո: Նրա խոսքով՝ ինքնաթիռը մեկ կիլոմետրից մի փոքր ավելի է հեռացել, օդանավի ֆյուզելյաժը փլուզվել է ընկնելու ժամանակ, մինչդեռ պոչը գրեթե չի վնասվել: Օդանավը շահագործվում է 1987 թվականից: