Նվիրատվություն սահմանապահ գյուղերի դպրոցներին՝ ի հիշատակ զոհված հերոս Կիմ Խաչատրյանի

Նոր ուսումնական տարում՝ նոր գրատախտակներ․ Վայոց ձորի սահմանապահ Արենի եւ Խաչիկ գյուղերի դպրոցների հին գրատախտակները փոխարինվել են նորերով։ Նվիրատվությունն իրականացրել են Հայ Յեղափոխական Դաշնակցության «Նիկոլ Աղբալյան» ուսանողական միությունը և Ֆրանսիայի «Նոր սերունդ» երիտասարդական միությունը։

Yerkir.am-ի հետ զրույցում «Նիկոլ Աղբալյան» ուսանողական միության ատենապետ Տարոն Ղազարյանը ասաց, որ ուսումնական հաստատությունների ընտրությունը պատահական սկզբունքով չի եղել, նվիրատվությունն արվել է այդ դպրոցներին՝ ի հիշատակ 44-օրյա պատերազմում զոհված հերոս Կիմ Խաչատրյանի․ Կիմը ՀՅԴ «Նիկոլ Աղբալյան» ուսանողական միության ջոկատի հրամանատարն էր:

«Նշված դպրոցների բոլոր դասասենյակների հին գրատախտակները փոխարինվել են նորերով։ Ի սկզբանե պլանավորված էր, որ նվիրատվություններն արվելու են սահմանամերձ գյուղերի դպրոցներին․ ընտրեցինք Վայոց ձորի սահմանապահ Արենի եւ Խաչիկ գյուղերը՝ ի հիշատակ մեր ընկեր, Արցախյան 44-օրյա պատերազմում զոհված հերոս Կիմ Խաչատրյանի։ Կիմը ուսում էր ստացել Արենիի միջնակարգ դպրոցում։ Նվիրատվություններից հետո այցելեցինք Կիմի, ապա՝ Գարեգին Նժդեհի շիրիմներին»,- ասաց Տարոն Ղազարյանը՝ նշելով, որ ծրագիրը  շարունակական է լինելու, սահմանապահ գյուղերը ուշադրության կենտրոնում են լինելու, Արցախից տարհանված ընտանիքները՝ առավելապես։

«Աջակցություն ենք ցուցաբերելու նաեւ բռնի տեղահանված մեր հայրենակիցներին, փորձելու ենք ինչ-որ չափով նրանց սոցիալական բեռը թեթեւացնել, դպրոցականների, կրթօջախների պայմանները բարելավել»,- հավելեց նա։

Լիանա Սարգսյան