Ե՞րբ եք առաջին անգամ Երեւան եկել. սահմանապահ գյուղերի երեխաների հարցերը` վարչապետին

ՀՀ վարչապետ Հովիկ Աբրահամյանն այսօր օպերայի և բալետի ակադեմիական թատրոնում հանդիպեց սահմանապահ համայնքների դպրոցականների հետ: Դպրոցականները, ովքեր այսօր առավոտյան են ժամանել Երևան, մի շարք հարցեր ուղղեցին վարչապետին: Տավուշի մարզի դպրոցականներից մեկը Հովիկ Աբրահամյանից հետաքրքրվեց` իր երեխաներին պատմե՞լ է, արդյոք, հեքիաթներ և ո՞ր հեղինակների հեքիաթներն է պատմել:

Հովիկ Աբրահամյանն ասաց, որ առաջ իր երեխաների, հիմա էլ թոռնիկների համար պատմում է Հովհաննես Թումանյանի հեքիաթները:

Մեկ այլ դպրոցականի հարցին, թե ե՞րբ է առաջին անգամ Երևան եկել, Հովիկ Աբրահամյանը պատասխանեց. «13 տարեկանում եմ առաջին անգամ Երևան եկել` դպրոցական էքսկուրսիայի շրջանակներում»:

Սահմանապահ համայնքների դպրոցականներն անակնկալ ունեին Հովիկ Աբրահամյանի համար. նրանք վարչապետին նվիրեցին իրենց նկարած կտավը ու սեփական ձեռքերով պատրաստած զամբյուղ` գեղեցիկ ծաղիկներով: