Թուրքիան դատապարտել է ԵՄ-ում՝ աշխատավայրերում, հիջաբ կրելու արգելքը

Թուրքիայի արտաքին գործերի նախարարությունը դատապարտել է ԵՄ Գերագույն դատարանի որոշումը, ըստ որի՝ գործատուները կարող են իրենց աշխատակիցներին արգելել աշխատավայրում հիջաբ կրել որոշակի պայմաններում:

Թուրքիայի արտգործնախարարության զեկույցում ընդգծվում է, որ այս որոշումը բացահայտորեն խախտում է մարդու դավանանքի իրավունքը:

«Որոշումը Եվրոպայում իսլամի նկատմամբ ատելությունն ու մուսուլմանների հանդեպ անհանդուրժողականությունն օրինականացնելու ջանքերի նոր օրինակ է»,- ասվում է հայտարարության մեջ:

Թուրքիայի արտաքին գործերի նախարարությունը շեշտել է, որ Եվրոպայում մուսուլմանները խտրականության են ենթարկվում կրոնի և էթնիկ պատկանելության պատճառով:

Նախարարությունը նշել է նաև, որ որոշումն ընդունվել է իսլամաֆոբիայի, այլատյացության և մուսուլմանների հանդեպ ատելության դրդապատճառներով հանցագործությունների թվի աճի ֆոնին:

«Այս որոշումը ոչ միայն անտեսում է մարդու դավանանքի ազատության իրավունքը, այլ նաև ստեղծում է այլատյացության իրավական հիմք: Մենք դատապարտում ենք որոշումը, որն իրավաբանորեն և բարոյապես սխալ է: Դա վտանգավոր է նաև իսլամաֆոբիան խրախուսելու տեսանկյունից»,- ասվում է հաղորդագրության մեջ:

Հիշեցնենք, որ օրեր առաջ ԵՄ–ն օրենք էր ընդունել, ըստ որի՝ ԵՄ անդամ երկրներում ընկերությունները կարող են, ըստ նպատակահարմարության, արգելել իրենց աշխատակիցներին՝ հիջաբ կրել։