ՌԴ-ում դատապարտված` Հայաստանի 157 քաղաքացի դիմել է` Հայաստանում պատիժը կրելու խնդրանքով

2015-ի մայիսի 1-ի դրությամբ Ռուսաստանի Դաշնությունից Հայաստանի Հանրապետություն փաստացի իրականացվել է 7 դատապարտյալի փոխանցում: ՀՀ արդարադատության նախարարի կողմից բավարարվել է ՌԴ-ից ՀՀ փոխանցման 32 դիմում, մերժվել՝ 115-ը, 10-ը գտնվում են քննարկման փուլում:

ՀՀ ԱՆ հաշվետվությունից տեղեկանում ենք, որ իրենց քաղաքացիության երկիր տեղափոխվելու ցանկություն են հայտնել ՀՀ ԱՆ քրեակատարողական հիմնարկներում պատիժը կրող`  Իրանի Իսլամական Հանրապետության 25 քաղաքացիներ: ՀՀ արդարադատության նախարարը բավարարել է 22 դատապարտյալի փոխանցման դիմում: Ներկայումս 3 դատապարտյալի փոխանցման դիմում գտնվում է քննարկման փուլում: ՀՀ արդարադատության նախարարի կողմից բավարարվել է Էստոնիայի Հանրապետությունում պատիժը կրող` ՀՀ քաղաքացի հանդիսացող մեկ դատապարտյալի դիմում, իսկ Իսպանիայի Թագավորությունում գտնվող դատապարտյալի դիմումը չի բավարարվել:

Ուսումնասիրվել և ընթացք է տրվել Ամերիկայի Միացյալ Նահանգներում պատիժը կրող`  ՀՀ քաղաքացու մեկ դիմում ՝ պատժի մնացած մասը Հայաստանում կրելու նպատակով ԱՄՆ-ից ՀՀ փոխանցման վերաբերյալ: Ընդհանուր առմամբ, պատասխան է տրվել օտարերկրյա հանրապետությունում պատիժը կրող ՀՀ քաղաքացիների՝ ՀՀ-ում պատժի մնացած մասը կրելու նպատակով 195 դիմումի, որոնցից 157-ը ներկայացվել է ՌԴ-ում պատիժը կրող քաղաքացիների կողմից: