Զարիֆը հայտարարել է, որ Իրանը պատրաստ է մասնակցել Ադրբեջանի՝ օկուպացիայից ազատագրված տարածքների վերականգնմանը

Ադրբեջանի արտգործնախարար Ջեյհուն Բայրամովը Դուշանբեում իրանցի գործընկեր Մոհամադ Ջավադ Զարիֆի հետ հանդիպման ժամանակ քննարկել է երկկողմ համագործակցության հարցեր: Այս մասին ասվում է Ադրբեջանի արտաքին գործերի նախարարության մամուլի ծառայության հաղորդագրության մեջ:

«Կողմերը բարձր են գնահատել այս տարի Ադրբեջանի և Իրանի միջև տնտեսական, առևտրի և հումանիտար ոլորտների պետական հանձնաժողովի վերջին նիստի արդյունքները:

Նախարարները քննարկել են նաև տարածաշրջանային անվտանգության խնդիրները, մասնավորապես՝ ղարաբաղյան երկրորդ պատերազմից հետո տարածաշրջանում տիրող իրավիճակը, ստորագրված եռակողմ հայտարարությունների իրագործումը», – նշվում է հաղորդագրության մեջ։

ԱԳՆ–ն նաև հայտնել է, որ մտքերի փոխանակություն է տեղի ունեցել Ադրբեջանի «ազատագրված տարածքներում» վերականգնման աշխատանքներ իրականացնելու վերաբերյալ: Զարիֆը նշել է, որ իրանական ընկերությունները պատրաստ են մասնակցել «ազատագրված տարածքների» ականազերծմանը և վերականգնմանը: