Իրանը պատրաստվում է գործարկել խոշոր նավթամուղ

Մոտ ապագայում Իրանում կգործարկվի խոշոր նավթամուղ, որը հնարավորություն կտա երկրին արտահանելու իր նավթի մեծ մասը Օմանի ծոցով: Այդ մասին հայտարարել է Իսլամական Հանրապետության նախագահ Հասան Ռոհանին:

«Առաջիկա ամիսներին մենք պետք է երկու խոշոր նախագիծ բացենք: Դրանցից մեկը Գուրե-Ջասկ նավթամուղն է, որը ներառում է 1000 կիլոմետր խողովակաշար, այնպես որ` մեր նավթի արտահանման մեծ մասը Պարսից ծոցից կտեղափոխվի Օմանի ծոց»,- հայտարարել է Ռոհանին Իրանի ազատ առևտրի գոտիներում մի քանի ենթակառուցվածքային և տնտեսական նախագծերի գործարկման արարողության ժամանակ:

Նա շեշտել է գազատարի կարևորությունը քաղաքական, անվտանգային և տնտեսական տեսանկյուններից:

Խողովակաշարը սկսվում է հարավարևմտյան Բուշեր նահանգի Գարե նավթային տերմինալից (Պարսից ծոցի ափին) և անցնում մինչև Իրանի հարավ-արևելքում (Օմանի ծոցի ափին) գտնվող Ջասկ նավահանգստի տերմինալը: 2 միլիարդ դոլար արժողությամբ նախագիծը Իրանին թույլ կտա արտահանման համար նավթ մատակարարել Հորմուզի նեղուցից դուրս: