Ադրբեջանը միջազգային ասպարեզում մեր բարեկամն ու հուսալի գործընկերն է. Ուկրաինայի ԱԳՆ

Ադրբեջանը միջազգային ասպարեզում Ուկրաինայի բարեկամը և հուսալի գործընկերն է. հայտարարել է Ուկրաինայի ԱԳՆ մամուլի ծառայությունը։

«Ուկրաինայի նախագահ Վլադիմիր Զելենսկին 2019-ի դեկտեմբերին Ադրբեջանի Հանրապետություն կատարած պաշտոնական այցի ընթացքում հայտարարել է, որ մեր պետությունների միջև հարաբերությունները ստուգված են ժամանակով։ Մենք երախտապարտ ենք Ադրբեջանի ղեկավարությանը Ուկրաինայի ինքնիշխանության և տարածքային ամբողջականության շարունակական աջակցության համար»,- ասել է ուկրաինական ԱԳՆ-ն ՝ հիշեցնելով, որ Ադրբեջանը գտնվում է տասը երկրների խմբում՝ Միացյալ Նահանգների, Մեծ Բրիտանիայի, Կանադայի, Գերմանիայի, Ֆրանսիայի, Վրաստանի, Լիտվայի, Լեհաստանի և Թուրքիայի հետ, որոնց հետ Ուկրաինան պատրաստ է զարգացնել ռազմավարական գործընկերությունը:

«Նման գործընկերության հիմնական նպատակներն են` մեր պետության տարածքային ամբողջականության վերականգնումը, տարածաշրջանային անվտանգության և էներգետիկ անկախության ամրապնդումը, տրանսպորտային ներուժի զարգացումը, տարբեր արդյունաբերություններում համատեղ լայնածավալ նախագծերի իրականացումը, ինչպես նաև մեր երկրների միջև տնտեսական, մշակութային և հումանիտար համագործակցության հետագա զարգացումը:

Այս համատեքստում պետք է առանձին նշել ուկրաինա-ադրբեջանական համագործակցությունը էներգետիկ ոլորտում, որի շնորհիվ Ուկրաինան իր էներգետիկ հաշվեկշռում ամբողջովին փոխարինել է ռուսական նավթը ադրբեջանական նավթով:

Համագործակցության այլ խոստումնալից ոլորտներից կարելի է առանձնացնել մաքսային ոլորտը, մասնավորապես`փորձի և առաջատար տեխնոլոգիաների փոխանակումը մաքսային գործունեության ոլորտում»,- նշել է Ուկրաինայի ԱԳՆ մամուլի ծառայությունը: