Ստոլտենբերգը հայտարարել է, որ ՆԱՏՕ-ն պատրաստ է Ռուսաստանի հետ առճակատման

Հյուսիսատլանտյան դաշինքի գլխավոր քարտուղար Իենս Ստոլտենբերգը հայտարարել է, որ ՆԱՏՕ-ն պատրաստ է ինչպես Ռուսաստանի հետ առճակատման, այնպես էլ փոխգործակցության, բայց ամեն ինչ կախված է Մոսկվայի դիրքորոշումից․ հաղորդում է ՏԱՍՍ-ը:

«Ես հավատում եմ Ռուսաստանին հստակ ազդանշան ուղարկելու անհրաժեշտությանը. եթե նրանք բախումներ են ուզում, մենք պատրաստ ենք: Եթե նրանք ցանկանան համագործակցել, մենք ուրախ կլինենք»,- ասել է Ստոլտենբերգը իսպանական El Mundo թերթին տված հարցազրույցում ՝ ավելացնելով, որ ՆԱՏՕ-ն պատրաստ է «պաշտպանել իր անդամներին»:

Նրա խոսքով՝ Ռուսաստանի հետ երկխոսությունը պետք է հիմնված լինի ուժի և կայունության վրա: «Բայց մենք պետք է խոսենք նաև Ռուսաստանի հետ: Զսպման և երկխոսության միջև որևէ հակասություն չկա: Նույնիսկ եթե մենք չենք հավատում, որ Մոսկվայի հետ հարաբերությունները կարող են ավելի լավ լինել, մենք պետք է անընդհատ խոսենք, քանի որ անհրաժեշտ է պահպանել կարևոր կապերն ու հարաբերությունները: Մտածեք զենքի վերահսկման մասին, որպեսզի խուսափեք սպառազինությունների մրցավազքից»,- հստակեցրել է ՆԱՏՕ-ի գլխավոր քարտուղարը:

«Նրանք (ռուսները) մեր հարևաններն են, նրանք ունեն շահեր, մենք պետք է խուսափենք միջադեպերից, հատկապես՝ սահմաններին: Որպես նորվեգացի քաղաքական գործիչ՝ ես Ռուսաստանի հետ աշխատելու մեծ փորձ ունեմ և գիտեմ, որ դա հնարավոր է»,- հավելել է Ստոլտենբերգը: