Կորոնավիրուսի դեմ «Սպուտնիկ V» պատվաստանյութը քաղաքացիական շրջանառության մեջ է մտել

COVID-19-ի դեմ «Սպուտնիկ V» ռուսաստանյան պատվաստանյութի առաջին խմբաքանակը քաղաքացիական շրջանառության մեջ է մտել, առաջիկայում մատակարարումներ են սպասվում տարածաշրջաններ: Այդ մասին հաղորդել է ՌԴ առողջապահության նախարարության մամուլի ծառայությունը:

Գերատեսչությունը նշել է, որ պատվաստանյութն անցել է անհրաժեշտ բոլոր լաբորատոր փորձարկումները:

Օգոստոսին Ռուսաստանում գրանցվել է կորոնավիրուսի դեմ աշխարհում առաջին պատվաստանյութը, որը մշակվել է Գամալեյայի անվան համաճարակաբանության եւ մանրէաբանության ազգային հետազոտական կենտրոնում (ՀՄԱՀԿ)՝ Ռուսաստանի ուղղակի ներդրումների հիմնադրամի (ՌՈւՆՀ) հետ համատեղ: Այն ստացել է «Սպուտնիկ V» անվանումը: Դա լուծույթ է՝ միջմկանային ներարկման համար: Ծրագրում են պատվաստել երկու փուլով՝ երեք շաբաթ ընդմիջումով: Այսպիսի սխեման, ըստ առողջապահության նախարարության, հնարավորություն է է տալիս իմունիտետ ձեւավորելու մինչեւ երկու տարի ժամկետով:

«Սպուտնիկ V» պատվաստանյութի կլինիկական հետազոտությունների առաջին-երկրորդ փուլերի արդյունքում լուրջ անցանկալի երեւույթներ (СНЯ, Grade 3) չեն հայտնաբերվել չափանիշներից ոչ մեկի գծով, այն դեպքում, երբ լուրջ անցանկալի երեւույթների մակարդակը մյուս թեկնածու պատվաստանյութերի մոտ տատանվում է 1 տոկոսից մինչեւ 25 տոկոս:

ՌՈւՆՀ-ի ղեկավար Կիրիլ Դմիտրիեւը հայտնել է, որ հիմնադրամն ավելի քան 20 երկրից 1 միլիարդ չափաբաժին գնելու հայտ է ստացել: Նա նշել է, որ Ռուսաստանը պատվաստանյութի արտադրության շուրջ պայմանավորվել է հինգ երկրի հետ, առկա հզորությունները թույլ են տալիս մեկ տարում արտադրել մինչեւ 500 միլիոն չափաբաժին:

ՌԴ առողջապահության նախարար Միխայիլ Մուրաշկոն հայտարարել է, որ պատվաստանյութը կսկսեն արտադրել երկու հարթակով՝ Գամալեյայի անվան կենտրոնը եւ «Բիննոֆարմ» գործարանը: