«Հայրենիք» կուսակցության ներկայացուցիչները հյուրընկալվել են ՀՅԴ Արցախի ԿԿ գրասենյակում

Օգոստոսի 17-ին, Ստեփանակերտի ՀՅԴ Նիկոլ Դուման կենտրոնում,  «Հայրենիք» կուսակցության նախագահ Արթուր Վանեցյանը և քաղաքական խորհրդի անդամները հանդիպել են  ՀՅԴ  Արցախի Կենտրոնական Կոմիտեի ներկայացուցիչ Դավիթ Իշխանյանի,  ԿԿ  նախագահ Արթուր Մոսիյանի  և ԿԿ անդամ, ԱՀ  ԱԺ արտաքին հարաբերությունների մշտական հանձնաժողովի նախագահ Վահրամ Բալայանի հետ:   

Բարի գալուստ մաղթելով  հյուրերին,  ՀՅԴ Արցախի ԿԿ  ներկայացուցիչ Դ. Իշխանյանը   կարևորել է քաղաքական ուժերի միջև համագործակցությունը՝ ընդգծելով   արտաքին քաղաքական ճակատում  միասնական օրակարգով հանդես գալու անհրաժեշտությունը: Իր խոսքում,  «Հայրենիք» կուսակցության նախագահ Արթուր Վանեցյանն նշել է ՀՅԴ՝  համազգային շահերին նպատակաուղղված գործունեությունն ու առանցքային դերակատարությունը՝ ազգային արժեքների պահպանման և  Հայաստան-Արցախ-Սփյուռք կապերի ու միասնության ամրապնդման գործում: Այնուհետև՝ Ա. Վանեցյանն  անդրադարձել է իր ղեկավարած կուսակցության նպատակներին ու ծրագրերին, ներկայացրել է նաև ադրբեջանա-ղարաբաղյան հակամարտության կարգավորման իրենց տեսլականը:
Հանդիպման ընթացքում երկուստեք կարևորվել են պետական հիմքերի ամրապնդումը,  ներքին համերաշխությունը, ինչպես նաև  Հայկական զույգ պետականությունների դերը՝ ազգային արժեքների պահպանման և սերունդների հայեցի դաստիարակության գործում՝ որպես ազգային անվտանգության բաղադրիչ:  

Այնուհետև՝ քննարկվել են Արցախի Հանրապետության  և Հայաստանի Հանրապետության արտաքին միասնական քաղաքականությանը և  անվտանգությանը  վերաբերող հարցեր:

 Կուսակցությունների ներկայացուցիչները հույս են հայտնել,  որ  առաջիկայում ևս  մտքերի փոխանակության և գործնական աշխատանքեր  իրականացնելու  առիթներ կստեղծվեն: