ՀՅԴ ՀԳՄ գրասենյակում հյուրընկալվել են ՀՅԴ Լիբանանի ԿԿ անդամն ու Այնճարի քաղաքապետը

ՀՅԴ Հայաստանի Գերագույն մարմնի անդամներն այսօր հանդիպել են ՀՅԴ Լիբանանի Կենտրոնական կոմիտեի անդամ Պարույր Տեր-Ղուկասյանի և Այնճարի քաղաքապետ Վարդգես Խոշյանի հետ, որոնց ուղեկցում էր ՀՅԴ Հայրենադարձների խորհրդատվության գրասենյակի ներկայացուցիչ Սիմոն Գաֆալյանը:

Ողջունելով հյուրերին՝ ՀՅԴ ՀԳՄ անդամները նրանց ներկայացրել են ՀՀ-ում և Արցախի շուրջ տեղի ունեցող վերջին զարգացումները, մատնանշել մարտահրավերներն ու դրանք դիմագրավելու ուղղությամբ տարվող աշխատանքները: Քննարկվել են նաև Լիբանանի շուրջ ստեղծված իրադրությունը, արձանագրվել լիբանանահայ համայնքի դիմագրաված դժվարություններն ու  հուզող բազմաթիվ խնդիրները:

Կարևորվել է Սփյուռքի համար առանցքային նշանակություն ունեցող լիբանանահայ համայնքին համայն հայության կողմից օժանդակություն կազմակերպելը։ Ցավալիորեն այս ուղղությամբ ՀՀ իշխանությունները դրսևորում են լիակատար անգործություն:

Մատնանշվել է նաև ՀՀ իշխանությունների որդեգրած ապազգային, պարտվողական, իսկ շատ դեպքերում՝ ուղղակի թուրքամետ քաղաքականության պատճառով ՀՀ-ի միջազգային դիրքերի թուլացման իրողությունը, ինչը լրջագույնս անդրադառնում է նաև Սփյուռքի կացության և Հայրենիք-Սփյուռք հարաբերությունների վրա:

Հանդիպման ավարտին ձեռք են բերվել համատեղ քայլերի ու ծրագրերի իրականացման ուղղությամբ մի շարք պայմանավորվածություններ: