Օգոստոսի 1-ին ՌԴ Ուզլովայա քաղաքում կբացվի գեներալ-մայոր Հայկ Մարտիրոսյանին և նրա մարտիկներին նվիրված հուշարձան

Օգոստոսի 1-ին ՌԴ Ուզլովայա քաղաքում (Տուլայի շրջան) Մեծ հաղթանակի 75-ամյակի և Քաղաքի օրվա կապակցությամբ հանդիսավորությամբ կբացվի հուշահամալիր`  նվիրված Կարմիր բանակի գեներալ-մայոր, 239-րդ հրաձգային դիվիզիայի հրամանատար Հայկ Մարտիրոսյանին և նրա մարտիկներին. տեղեկացնում է yerkir.am-ը` stalinogorsk.ru կայքին հղումով:

Իսկ Բիբիկովո գյուղի տներից մեկի պատին, որտեղ 1941 թվականի նոյեմբերի 16-21-ը գտնվել է  239-րդ հրաձգային դիվիզիայի շտաբը, կամրացվի հուշատախտակ:

Հայկ Մարտիրոսյանին և նրա դիվիզիայի մարտիկներին նվիրված հուշարձանը կկանգնեցվի Ռուսաստանյան ռազմա-պատմական ընկերակցության, Ուզլովայա շրջանի մունիցիպալ մարմնի, «Ռուսաստանի հայերի միություն» համառուսաստանյան հասարակական կազմակերպության Տուլայի մասնաճյուղի, «Ստալինոգորսկ 1941» ինտերնետային նախագծի և Ռուսաստանի, Հայաստանի, Հունաստանի, Իսպանիայի, ԱՄՆ-ի, Ֆրանսիայի ու Ուզբեկստանի ավելի քան 50 քաղաքացիների համատեղ ջանքերով: Նախաձեռնողը և կազմակերպիչներից մեկը Էդվին Շիրինյանն է (Ուզլովայայի կաթի կոմբինատ):