Ըստ ճապոնացի վերլուծաբանների` թուրքական «հյուծված» լիրան կշարունակի արժեզրկվել

Թուրքիայի ազգային «հյուծված» արժույթը կշարունակի արժեզրկվել, սակայն  2018-ի արժութային ճգնաժամը չի կրկնվի: Այս կարծիքին են Ճապոնիայի խոշոր Mitsubishi UFJ Financial Group վարկաֆինանսական հաստատության վերլուծաբանները. ըստ yerkir.am-ի` տեղեկացնում է EADaily-ն:

MUFG-ի կանխատեսման համաձայն` լիրան կսկսի թուլանալ առնվազն քանի դեռ Էրդողանի կառավարությունը չի սանձել արժեզրկումը:

«Ներկայումս գործում են լիրայի առքուվաճառքի ավելի խիստ սահմանափակումներ, հետևաբար` 2018-ի օգոստոսին տեղի ունեցած մասշտաբային դևալվացիան դժվար թե կրկնվի: Սակայն  շարժման ուղղությունը պարզ է, և մենք կանխատեսում ենք լիրայի արժեքի հետզհետե նվազում ապագայում»,- նշել են ճապոնացի վերլուծաբանները:

Երեկ Թուրքիայի լիրայի փոխարժեքը հասել է 7-ի` 1 ԱՄՆ դոլարի դիմաց, որն ամենացածր մակարդակն է` սկսած մայիսի սկզբից, երբ լիրան ընկել էր մինչև պատմական նվազագույնը` 7,2690` 1 դոլարի դիմաց:

Այս շաբաթ` ավելի վաղ, Թուրքիայի կենտրոնական բանկը հայտարարել էր, որ տոկոսադրույքների ներկայիս մակարդակը բավարար է տարեվերջին արժեզրկումը հունիսի 12,6 տոկոսից մինչև 8,9 տոկոս դանդաղեցնելու համար:  Ներկայումս թուրքական ֆինանսական կարգավորիչի բազային տոկոսադրույքը 8,25 տոկոս է:

MUFG-ի վերլուծաբաններն ասում են, որ լիրայի թուլացման պատճառ է դարձել Թուրքիայի պետական բանկերի գլխավորած` վարկավորման բումը: Այդ կապակցությամբ ներդրողները նաև սպասում են Թուրքիայի ընթացիկ գործողությունների հաշիվների վիճակի վատացում:

«Դեպի դեֆիցիտ սողացող Թուրքիայի ընթացիկ հաշվի վիճակը ազգային արժույթի հետագա արժեզրկման նախանշան է»,- ասել են ճապոնացի վերլուծաբանները:

Թուրքական տնտեսությունն ակտիվորեն վերականգնվում է կորոնավիրուսի համավարակի ազդեցությունից հետո: Այդ մասին մեկ ամիս ասաջ հայտարարել էր երկրի ֆինանսների նախարա Բերաթ  Ալբայրաքը` հունիսի 23-ին ելույթ ունենալով Թուրքիայի բանկերի ասոցիացիայի նիստում: Նրա խոսքով` թուրքական տնտեսության վերականգնումը տեղի է ունենում  V-աձև (կտրուկ անկմանը հաջորդում է կտրուկ աճ), և ամեն ինչ խոսում է այն մասին, որ շուտով կհասնի զարգացման կանխատեսվող տեմպերին:

«Համավարակի հետևանքները կլինեն երկրի տնտեսական կյանքի բոլոր ոլորտներում: Բանկերը նույնպես պետք է հաշվի առեն ու հարմարվեն Թուրքիայի վերականգնման ու զարգացման նպատակներին»,- ասել էր Ալբայրաքը: