ՏԵՍԱՆՅՈՒԹ․ Բաց տարածքում դիմակ չունենալու համար 10 հազար դրամ տուգանք․ բայց դիմակ ունենալ դեռ չի նշանակում՝ դիմակ կրել․․․

Արտակարգ իրավիճակի հիմքով հայտարարված արտակարգ դրության ընթացքում ազատ տեղաշարժման պայմանները, պահանջները խախտելը առաջացնում են տուգանքի նշանակում` սահմանված նվազագույն աշխատավարձի տասնապատիկի չափով՝ ըստ Yerkir.am-ի խորհրդարանն առաջին ընթերցմամբ հավանության արժանացրեց այս փոփոխությունը, որը կատարվեց «Վարչական իրավախախտումների վերաբերյալ ՀՀ օրենսգրքում լրացում և փոփոխություն կատարելու մասին» օրենսգրքում ՝ 182.3-րդ հոդվածի 10-րդ մասը լրացնելով նոր մասով։ Փոփոխությամբ առաջարկվում է նաև նույն հոդվածի 10-րդ մասից հանել «կամ ազատ տեղաշարժվելու իրավունքի այլ սահմանափակումները» բառերը։ Եվ առաջարկվեց, որ օրենքի նախագիծն ուժի մեջ մտնի հրապարակման պահից։

Օրինագիծն առաջարկում է ավելի մեղմ պատժաչափ` 100-250 հազար դրամի փոխարեն տուգանք 10 հազար դրամի չափով՝ ազատ տեղաշարժման պայման-պահանջը խախտելու համար:

«Խոսքը, մասնավորապես, վերաբերում է պարետի որոշմամբ սահմանված՝ բաց տարածքներում դիմակների պահանջին. գործող օրենքով տուգանքը 100-250 հազար դրամ է, հիմա առաջարկվում է նման դեպքերում սահմանել 10 հազար դրամ»,-ասաց ՀՀ արդարադատության նախարարի տեղակալ Վահե Դանիելյանը՝ նշելով, որ նախորդ՝ մեծ պատժաչափն անհամաչափ էր:

Նա ներկայացրեց այն հիմնավորումները, որոնք ստիպել են այսպիսի փոփոխություն կատարել օրենսգրքում․ «Ներկայումս ինչպես մեկուսացման կամ ինքնամեկուսացման կանոնների խախտման համար, այնպես էլ ազատ տեղաշարժման իրավունքի այլ սահմանափակումների համար սահմանվում է պատասխանատվություն՝ նվազագույն աշխատավարձի 100-250-ապատիկի չափով, սակայն ներկայումս գործում են ազատ տեղաշարժի որոշ սահմանափակումներ, որոնք, մեր կարծիքով, համադրելի չեն մեկուսացման կամ ինքնամեկուսացման կանոնների խախտման հետ, հաշվի առնելով դրանց հանրային վտանգավորությունը, հետևաբար, առաջարկվել է ավելի մեղմ պատժաչափի՝ 10 հազար դրամի պահանջ, ազատ տեղաշարժման պայման-պահանջ խախտելու համար»։

Այս խճճված ձևակերպումը պարզեցնելով՝ նա բացատրեց, որ մեկուսացման պահանջը խախտելը ավելի վտանգավոր է, քան դիմակ չկրելը, հետևաբար պատիժն էլ պետք է տարբեր լինի։

Պատագամավորների բազմաթիվ հարցերին ի պատասխան, փոխնախարարը որոշակի հստակեցում մտցրեց նաև փոխվարչապետ Ավինյանի՝ մայիսի 14-ի որոշման ձևակերպումների մեջ, որոնք, ըստ պատգամավորների, իրավական որոշակիության խնդիր ունեն։

Փաստորեն, ըստ փոխնախարարի, երբ այդ մայիսի 14-ի որոշմամբ սահմանվել է, որ բաց տարածքներում դիմակի առկայութունը պարտադիր է, սա դեռ չի նշանակում, որ դիմակը պետք է մարդու դեմքին լինի․․․

«Դիմակը վերցնում են, դրսում պարտադիր չէ կրելը, բայց պետք է իր հետ ունենալ։ Նպատակն այն է, որ եթե անձը բաց տարածքից տեղափոխվի փակ տարածք՝ հնարավորություն ունենա օգտագործելու այդ դիմակը։ Ձեռնոցներ կրելու պահանջը դրսում պարտադիր չէ»,-ասաց փոխնախարարը։

Ինչ վերաբերում է ներսում դիմակ կրելուն, նա պարզաբանեց, որ դա էլ կարգավորվում է ոչ թե փոխվարչապետի մայիսի 14-ի որոշմամբ, այլ գործող օրենքով, որի նույն հոդվածի 3-րդ մասը նման պատասխանատվություն սահմանում է տնտեսվարողների համար․ «Մասնավորապես, որտեղ ֆինանսատնտեսական գործունեության սահմանափակումների առանձին տեսակների համար տնտեսվարող սուբյեկտների համար առկա է պատասխանատվության տեսակ 100-300 հազար դրամ։ Այսինքն, փակ տարածքներում դիմակ չկրելու համար տնտեսվարող սուբյեկտներն են պատասխանատու և իրենք համապատասխան պատասխանատվություն կկրեն»։

Այսինքն, դատելով փոխնախարարի պատասխանից՝ փակ տարածքում դիմակ չկրելու համար տնտեսվարողին  100-300 հազար դրամ տուգանելը համաչափ է, իսկ բաց տարածքում նույն դիմակը չունենալու համար 100-250 հազար դրամ տուգանքը համաչափ չէր, դրա համար էլ նվազեցրին 10 հազարի։

Պատգամավորի ճշտող հարցին՝ տվյալ ընկերությո՞ւնը կվճարի տուգանքը, թե՞ դիմակ չկրող անձը, փոխնախարարը պատասխանեց․ «Փակ տարածքներում սուբյեկտի մուտքը պետք է թույլ տան միայն դիմակի առկայության պայմաններում, այսինքն, եթե դիմակ չի կրում՝ տնտեսվարող սուբյեկտն է ենթարկվում պատասխանատվության»։

Նրա խոսքով՝ տնտեսվարող սուբյեկտի վրա է դրված պահանջը, որ յուրաքանչյուր քաղաքացի, երբ մտնում է սպասարկման սրահ, նրանց ընդունել բացառապես երբ դիմակ ունեն կամ ունեն ձեռնոցներ։

Օրենքի ներկա փոփոխությունը՝ 10 հազար դրամի տուգանքը, թեև վերաբերում է միայն բաց տարածքում դիմակ չունենալուն, բայց այսպես հստակ նշված չէ նախագծում՝ դիմակի առկայությունը չի նշվում։ Փոխնախարարը պարզաբանեց, որ ընդհանուր ձևակերպումը միտումնավոր են ընտրել․ « Ինչո՞ւ ենք ընտրել այս ընդհանուր ձևակերպումը, որովհետև պահանջը կարող է հաջորդ պահին փոխվել, օրինակ, ըստ կարիքի կարող է պարտադիր լինել օրինակ, ձեռնոցի կրելը՝ հիպոթետիկ օրինակ եմ բերում»։

Պատգամավորները հետաքրքրվեցին՝ իսկ այն դեպքերում, երբ մարդը դուրս է եկել կանաչի գնելու և տեղաշարժի թերթիկ չունենալու համար նրան տուգանք են նշանակել 250 հազար դրամ, արդյո՞ք այս տուգանքները չեն չեղարկվելու, քանի որ հասկանալի է, որ շատերը հնարավորություն չունեն այդ տուգանքը վճարելու և չեն վճարելու։ Փոխնախարարը ի պատասխան միայն արձանագրեց, որ օրենքը հետադարձ ուժ չունի։

Մանրամասն՝ տեսանյութում․