Արթուր Թովմասյանը կառաջադրվի ԱՀ ԱԺ նախագահի թեկնածու

Արցախի Հանրապետության նորընտիր նախագահ Արայիկ Հարությունյանը ֆեյբուքյան էջում գրառում է կատարել մայիսի 13-ին կայացած «Ազատ հայրենիք — ՔՄԴ» կուսակցությունների դաշինքում ընդգրկված քաղաքական ուժերի մասնակցությամբ կայացած արտահերթ նիստի արդյունքների մասին.

«Հարգելի ՛ հայրենակիցներ

Քիչ առաջ Շուշի քաղաքի մշակույթի պալատում ավարտվեց «Ազատ հայրենիք — ՔՄԴ» կուսակցությունների դաշինքում ընդգրկված քաղաքական ուժերի մասնակցությամբ հրավիրված արտահերթ նիստը, որտեղ կայացած փակ գաղտնի քվեարկության արդյունքում Ազգային ժողովի նախագահի պաշտոնի համար մեր քաղաքական թիմի կողմից առաջադրվելիք թեկնածուներից առավելագույն ձայներ է ստացել Արթուր Թովմասյանը:

Նիստում որոշում է կայացվել նաեւ ձեւավորվելիք խորհրդարանում մեր քաղաքական դաշինքի խմբակցության ղեկավար ընտրել Արթուր Հարությունյանին, քարտուղար՝ Էլեոնորա Ավանեսյանին:

Ի դեպ, տեղեկացնեմ նաեւ, որ «Ազատ հայրենիք — ՔՄԴ» կուսակցությունների դաշինքի նախընտրական ցուցակից Կարեն Դանիելյանը կնշանակվի Նախագահի աշխատակազմի ղեկավար, Լուսինե Ղարախանյանը՝ կրթության, գիտության եւ սպորտի հարցերով նախարար, իսկ Արամ Սարգսյանը՝ քաղաքաշինության նախարար:

Մնացած նշանակումների մասին՝ հերթով՝ առաջիկայում»:

Ավելի վաղ տեղեկացրել էինք, որ Արցախի նորընտիր նախագահ, «Ազատ հայրենիք – ՔՄԴ» կուսակցության առաջնորդ Արայիկ Հարությունյանը գրել էր. այսօր կորոշենք՝ ովքեր են առաջադրվելու ԱԺ նախագահի և մշտական հանձնաժողովների ղեկավար կազմի համար: