Ձեզնից պահանջվում է պատասխանատու վերաբերմունք ինչպես խոսքի, այնպես էլ մարդու հանդեպ․ նախագահ

Մամուլի ազատության միջազգային օրվա առիթով շնորհավորական ուղերձ է հղել ՀՀ նախագահ Արմեն Սարգսյանը, որում նշված է.

«Մամուլի ազատության միջազգային օրվա առիթով շնորհավորում եմ լրագրողներին և լրատվամիջոցների աշխատակիցներին․ դուք մեր բարդ ժամանակների պարզապես արձանագրողն ու լուսաբանողը, ականատեսն ու գրառողը չեք, այլև այդ ամենի անմիջական մասնակիցն եք՝ մեր քաղաքացիներին ապահովելով հրատապ և սպասված տեղեկատվությամբ։

Այն, որ այսօր հասարակությունն ավելի տեղեկացված է, ավելի արագ ու անմիջական է արձագանքում երևույթներին, ավելի ակտիվ է մասնակցում իրադարձություններին, մեծապես պայմանավորված է նաև ձեր աշխատանքով: Աշխատանք, որը ձեզնից պահանջում է լարված ջանքեր, որոնք ոչ միշտ են տեսանելի, զոհողություններ, որոնց մասին ոչ միշտ ենք տեղեկանում, նվիրում, որը երբեմն ձեզ մղում է անձնականը ստորադասել մասնագիտականին։ Եվ, իհարկե, աշխատանք, որը ձեզնից պահանջում է պատասխանատու վերաբերմունք ինչպես խոսքի, այնպես էլ մարդու հանդեպ, որովհետև յուրաքանչյուր խոսքի հետևում տեսանելի և անտեսանելի ճակատագիր է՝ մարդու, ընտանիքի, երկրի, ժողովրդի ճակատագիր։

Շնորհակալ եմ բարձր գնահատականի արժանի ձեր անձնազոհ աշխատանքի համար, որն օգնում է լինել տեղեկացված, կայանալ ու ձևավորվել որպես քաղաքացի, որպես իշխանություն, որպես հասարակություն։
Շնորհակալ եմ մեր արդյունավետ համագործակցության համար։

Երջանկություն, բարեկեցություն և ամենայն բարիք ձեզ ու ձեր ընտանիքներին»: