ՏԵՍԱՆՅՈՒԹ. Եթե Սամցխե-Ջավախքում գրանցվի ևս մեկ վարակ, Ախալդաբան կփակվի

Սամցխե-Ջավախքի նահանգապետը պարզաբանեց, թե որ դեպքում կփակվի Բորժոմի մունիցիպալիտետի Ախալդաբա ավանը: Ըստ Բեսիկ Ամիրանաշվիլիի, համակարգող շտաբը սպասում է Լուգարի լաբորատորիա ուղարկված կորոնավիրուսը հաստատող կամ բացառող հետազոտության պատասխաններին, ըստ որի ՝ կորոշվի ՝ խստացվեն մարզում կարանտինային պայմանները, թե ոչ. tv9news.ge-ի փոխանցմամբ՝ հայտնում է Yerkir.am-ը:

10 մարդու հետազոտության արդյունքները երեկ, ապրիլի 16-ին ուղարկվել են Լուգարի Լաբորատորիա: Այդ թվում են նաև վարակակիր տղամարդու ընտանիքի անդամներն ու նրա հետ սերտ կապ ունեցող անձինք: 

Նահանգապետի խոսքով, տղամարդը ոչ միայն Ախալդաբայի բնակչության, այլ ուրիշ գյուղերի բնակչության հետ էլ է շփվել: Ամիրանաշվիլին ասում է, որ բոլոր այդ մարդիկ մեկուսացված են և անցնում են կարանտինային ռեժիմի: 

Նշենք, որ Սամցխե-Ջավախքում կորոնավիրուսի առաջին դեպքն արդեն գրանցվել է: Վարակակիրը մոտ 30 տարեկան տղամարդ է, ով Թբիլիսիից վերադարձել էր Ախալդաբա: Երեկ երեկոյան մեկուսացվել է նաև նրա քույրը՝ նրա հետազոտության պատասխանները բացասական են: