Չինաստանում համաճարակի սկզբից ի վեր առաջին անգամ մահ չի գրանցվել. The Guardian

Թեև Չինաստանում շարունակվում են կորոնավիրուսով վարակվելու դեպքեր արձանագրվել, սակայն այսօր ՉԺՀ  առողջապահության ազգային հանձնաժողովը զեկույց է հրապարակել, ըստ որի` համաճարակի մոնիթորինգի սկզբից  ի վեր առաջին անգամ` վերջին օրվա ընթացքում մահ չի եղել. տեղեկացնում է Yerkir.am-ը` The Guardian-ին հղումով:

Զեկույցի համաձայն` երկրում արձանագրվել է COVID-19-ով վարակման 32 դեպք, բոլորն էլ բերված են այլ երկրներից: Հայտնաբերվել է նաև առանց ախտանշանների 30 վարակակիր: 

Վարակի` առանց ախտանշանների տարածումը վերջերս է սկսել անհանգստացնել չինական կառավարությանը, և նրանք նույնպես ընդգրկվում են վարակվածների ցուցակում: Վարակաբան Չժան Վենխունի խոսքով` նրանք դառնում են վարակի փոխանցման 18-31 տոկոս դեպքերի պատճառը:

Չինաստանում հունվարից արձանագրվել է նոր տիպի կորոնավիրուսով վարակման 81740 դեպք, մահացել է  3331 մարդ: