Արտակարգ դրություն Չեխիայում՝ կորոնավիրուսի պատճառով

Չեխիայում արտակարգ դրություն է հայտարարվել կորոնավիրուսի պատճառով: ТАСС գործակալության փոխանցմամբ՝ այս մասին կառավարության նիստի ավարտին հայտարարել է երկրի վարչապետ Անդրեյ Բաբիշը. հայտնում է Yerkir.am-ը:

«Չեխիայում արտակարգ դրություն է սահմանվում հինգշաբթի 14:00-ից ըստ կենտրոնական եվրոպական ժամանակի (երևանյան 17:00): Այն կգործի 30 օր»,- ասել է գործիչը:  

Արտակարգ դրություն է սահմանվել կորոնավիրուսի տարածման պատճառով: Ներկա պահին երկրում 96 հոգու հաստատվել է որպես կորոնավիրուսի վարակակիր:

Իշխանություններն արգելել են նաև մուտքը երկիր կորոնավիրուսի տարածման օջախ հանդիսացող 13 պետություններից: Խոսքը Չինաստանի, Հարավային Կորեայի, Իրանի, Իտալիայի, Իսպանիայի, Ավստրիայի, Գերմանիայի, Շվեյցարիայի, Շվեդիայի, Նիդեռլանդների, Նորվեգիայի, Բելգիայի և Մեծ Բրիտանիայի մասին է:

Բաբիշի խոսքով՝ Չեխիայի քաղաքացիներին նույնպես արգելվել է այցելել այդ երկրներ: